കരിങ്കൊടിയുമായി നടക്കാതെ കോടതിയിൽ പോകാൻ യൂത്ത് ലീഗിനോട് മന്ത്രി ജലീൽ; വീഡിയോ

തിരൂരങ്ങാടി ∙ യൂത്ത്‍ ലീഗിനെ പരിഹസിച്ചും വെല്ലുവിളിച്ചും മന്ത്രി കെ.ടി.ജലീൽ. ചെമ്മാട് പ്രവാസി സേവാകേന്ദ്രയുടെ ഉദ്ഘാടനത്തിനെത്തിയ മന്ത്രിക്കു നേരെ പ്രതിഷേധം നടത്തിയതിനെ തുടർന്നാണ് പ്രസംഗത്തിൽ രൂക്ഷമായി വിമർശിച്ചത്. യൂത്ത് ലീഗിന് കരിങ്കൊടിയുമേന്തി നടക്കാൻ നാണമില്ലേ എന്ന് മന്ത്രി ചോദിച്ചു. ഈ ശക്തിയുടെ ആയിരത്തിലൊന്ന് ഉപയോഗിച്ചാൽ കോടതിയിൽ പോയി കേസ് കൊടുക്കാം.

നിങ്ങൾക്ക് കോടതിയെക്കൊണ്ട് പറയിപ്പിക്കാൻ കഴിയാത്തിടത്തോളം കാലം നിങ്ങളുടെ ഈ ജാഥ കൊണ്ട് ഒരു പ്രയോജനവും ഇല്ല. ബിജെപിക്കാർ നാമജപയാത്രയുമായും യൂത്ത്‍ ലീഗുകാർ കരിങ്കൊടിയുമായും നടക്കുകയാണ്. രണ്ടും ഒരേ ലക്ഷ്യത്തോടെയാണെന്നും മന്ത്രി പറഞ്ഞു. മന്ത്രി പ്രസംഗിക്കുമ്പോൾ പ്രതിഷേധ പ്രകടനവുമായെത്തിയ യൂത്ത് ലീഗുകാരെ ഡിവൈഎസ്പി പി.മോഹനചന്ദ്രന്റെ നേതൃത്വത്തിലുള്ള പൊലീസ് സംഘം തടഞ്ഞു. പിന്നീട് മന്ത്രി തിരിച്ചുപോകുമ്പോൾ വീണ്ടും കരിങ്കൊടി കാണിച്ചു.