KSTRC superfast bus service from Angadippuram to Pamba starts today

അങ്ങാടിപ്പുറത്തുനിന്ന് പമ്പയിലേക്ക് കെ.എസ്.ആർ.ടി.സി സൂപ്പര്‍ഫാസ്റ്റ് ബസ് സര്‍വീസ് വെള്ളിയാഴ്ച വൈകുന്നേരം ഏഴുമണിക്ക് തുടങ്ങും. മന്ത്രി മഞ്ഞളാംകുഴി അലി ഉദ്ഘാടനംചെയ്യും. ഏഴുമണിക്ക് അങ്ങാടിപ്പുറത്തുനിന്ന് പുറപ്പെടുന്ന ബസ് പിറ്റേദിവസം പുലര്‍ച്ചെ 4.25ന് പമ്പയിലെത്തും. ഉച്ചയ്ക്ക് 12.45ന് തിരിക്കുന്ന ബസ് രാത്രി 9.40ന് അങ്ങാടിപ്പുറം തിരുമാന്ധാംകുന്നിലെത്തും.

ജില്ലയില്‍നിന്ന് പമ്പയിലേക്ക് കെ.എസ്.ആര്‍.ടി.സി. മൂന്ന് സര്‍വീസുകള്‍ നടത്തും. നിലമ്പൂര്‍, ചമ്രവട്ടം എന്നിവിടങ്ങളില്‍നിന്നാണ് മറ്റ് രണ്ട് സര്‍വീസുകൾ. ചമ്രവട്ടത്ത് കെ.ടി. ജലീല്‍ എം.എല്‍.എ.യും നിലമ്പൂരില്‍ നഗരസഭാധ്യക്ഷന്‍ ആര്യാടന്‍ ഷൗക്കത്തും വെള്ളിയാഴ്ച ആദ്യസര്‍വീസുകള്‍ ഫ്‌ളാഗ്ഓഫ് ചെയ്യും. നിലമ്പൂരില്‍നിന്ന് ഫാസ്റ്റ് പാസഞ്ചറും ചമ്രവട്ടത്തുനിന്നും അങ്ങാടിപ്പുറത്തുനിന്നും സൂപ്പര്‍ഫാസ്റ്റ് ബസുകളുമാണ് സര്‍വീസ് നടത്തുക. നിലമ്പൂരില്‍നിന്ന് പമ്പയിലേക്ക് 252 രൂപയാണ് ടിക്കറ്റ് നിരക്ക്.

നിലമ്പൂരില്‍നിന്ന് മലപ്പുറം, കോട്ടയ്ക്കല്‍ വഴിയെത്തുന്ന ബസ് ഏഴോടെ കുറ്റിപ്പുറം മിനിപമ്പയിലെത്തും. 10 മിനിറ്റ് മിനിപമ്പയില്‍ നിര്‍ത്തിയിടും. അങ്ങാടിപ്പുറത്തുനിന്ന് പെരിന്തല്‍മണ്ണ, പട്ടാമ്പി വഴിയാണ് ബസ് സര്‍വീസ് നടത്തുക. ഗുരുവായൂര്‍ വഴിയാണ് സര്‍വീസുകള്‍ ക്രമപ്പെടുത്തിയിരിക്കുന്നത്.

നിലമ്പൂരില്‍നിന്ന് വൈകീട്ട് 4.30ന് പുറപ്പെടുന്ന ബസ് പിറ്റേദിവസം പുലര്‍ച്ചെ നാലിന് പമ്പയിലെത്തും. ചമ്രവട്ടം അയ്യപ്പക്ഷേത്രപരിസരത്തുനിന്ന് വൈകീട്ട് അഞ്ചിന് പുറപ്പെടുന്ന ബസ് പിറ്റേന്ന് രാവിലെ 3.30നും പമ്പയിലെത്തും.

Summary:KSTRC superfast bus service from Angadippuram to Pamba starts today as a part of mandala pooja festival at Sabarimala