സുഹൃത്തുക്കളുമായി മദ്യപിക്കുന്നതിനിടെ ഇറങ്ങിപ്പോയി; പിന്നെ കണ്ടത് കത്തിക്കരിഞ്ഞ മൃതദേഹം
കുറ്റിപ്പുറം: കുറ്റിപ്പുറം മഞ്ചാടിയിൽ കത്തിക്കരിഞ്ഞ നിലയിൽ കണ്ടെത്തിയ മൃതദേഹം തിരിച്ചറിഞ്ഞു തവനൂർ തൃപ്പാല്ലൂർ സ്വദേശി അച്യുതാനന്ദനാണ് മരിച്ചത്. 58 വയസ്സായിരുന്നു. ഇന്നലെ വൈകീട്ട് കുറ്റിപ്പുറം മഞ്ചാടിയിലെ ബാറിൽ സുഹൃത്തുക്കൾക്കൊപ്പം മദ്യപിക്കാനെത്തിയതായിരുന്നു അച്യുതാനന്ദൻ. ഇടക്ക് പുറത്ത് പോയ ഇയാളെ പിന്നീട് കാണാതായി. അതിനിടെയാണ് ബാറിന് സമീപത്ത് ഭാരതപ്പുഴയിലെ പുൽക്കാടിന് തീ പിടിച്ചത്. ഇതു അണച്ചതിന് പിന്നാലെ റോഡരികിൽ കത്തിക്കരിഞ്ഞ നിലയിൽ പുരുഷ മൃതദേഹം കണ്ടെത്തി. ആദ്യ മണിക്കൂറുകളിൽ ആളെ തിരിച്ചറിഞ്ഞിരുന്നില്ല. അജ്ഞാത മൃതദേഹം എന്ന നിലയിൽ പൊലീസ് നടപടികൾ സ്വീകരിച്ച് വരുന്നതിനിടെയാണ് അച്യുതാനന്ദനെ കുറിച്ചുള്ള വിവരങ്ങൾ ലഭിച്ചത്. ബാറിൽ നിന്ന് പുറത്തിറങ്ങിയ ഇയാൾ എങ്ങനെ അപകടത്തിൽ പെട്ടുവെന്നതിൽ വ്യക്തതയില്ല. മദ്യലഹരിയിൽ റോഡരികിൽ വീണതിന് പിന്നാലെ തീപ്പിടുത്തത്തിൽ അകപ്പെട്ടതാകുമെന്ന് സംശയിക്കുന്നു. ബന്ധുക്കളെത്തിയാണ് മൃതദേഹം തിരിച്ചറിഞ്ഞത്. നേരത്തെ ഖത്തറിലായിരുന്ന ഇയാൾ വർഷങ്ങളായി തനിച്ച് വാടക വീട്ടിൽ താമസിച്ച് വരികയാണ്. വീടുമായോ കുടുംബങ്ങളുമായോ വലിയ ബന്ധമില്ല. മൃതദേഹം പോസ്റ്റ്മോർട്ടം നടത്തി ബന്ധുക്കൾക്ക് വിട്ട് നൽകി
വളാഞ്ചേരി ഓൺലൈൻ വാർത്തകൾ വാട്സാപ്പിൽ ലഭിക്കാൻ Click Here.
വളാഞ്ചേരി ഓൺലൈൻ ഇപ്പോൾ ടെലഗ്രാമിലും ലഭ്യമാണ്. സബ്സ്ക്രൈബ് ചെയ്യൂ Click Here
