കോട്ടയ്ക്കലിൽ വയോധികനെ ഇടിച്ചുതെറിപ്പിച്ചത് പതിനേഴുകാരൻ

കോട്ടയ്ക്കൽ : സീബ്രാലൈനിൽ റോഡ് മുറിച്ചുകടക്കുകയായിരുന്ന വയോധികനെ ഇടിച്ചുതെറിപ്പിച്ചത് പുതുപ്പറമ്പ് സ്വദേശിയായ പതിനേഴുകാരനാണെന്ന്‌ കണ്ടെത്തി. കഴിഞ്ഞ 24-നായിരുന്നു കോട്ടയ്ക്കലിൽ അപകടമുണ്ടായത്. ചങ്കുവെട്ടി എടക്കണ്ടൻ കുഞ്ഞിമൊയ്തീനെയാണ് സീബ്രാലൈനിലൂടെ റോഡ് മുറിച്ചുകടക്കുന്നതിനിടയിൽ ബൈക്ക് ഇടിച്ചുതെറിപ്പിച്ചത്. അപകടസ്ഥലത്തെ സി.സി.ടി.വി.യിൽ പതിഞ്ഞ ദൃശ്യങ്ങളാണ് നിർത്താതെ പോയ ബൈക്ക് കണ്ടെത്താൻ സഹായകമായത്.

പ്രായപൂർത്തിയാകാത്ത പ്രതിയെ ജുവനൈൽ കോടതിയിൽ ഹാജരാക്കുമെന്ന് പോലീസ് പറഞ്ഞു. തിരൂർക്കാട് സ്വദേശിയുടേതാണ് ബൈക്ക്.അപകടത്തിൽ പരിക്കേറ്റ കുഞ്ഞിമൊയ്തീന്റെ ഇടതുകാൽമുട്ടിനുതാഴെ മുറിച്ചുമാറ്റിയിരുന്നു. സ്റ്റേഷൻ ഇൻസ്‌പെക്ടർ എം.കെ. ഷാജിയുടെ നിർദേശപ്രകാരം എസ്.ഐ. വിവേക് ആണ് കേസ് അന്വേഷിച്ചത്.
https://fb.watch/b1wc-99FMa/