കുറ്റിപ്പുറം ഗവ. ഹോമിയോ ആശുപത്രിയുടെ ചുറ്റുമതിൽ തകർന്നു വീണു

കുറ്റിപ്പുറം : മഴയിൽ ഗവ. ഹോമിയോ ആശുപത്രിയുടെ ചുറ്റുമതിൽ തകർന്നുവീണു. പള്ളിയിടവഴി റോഡിന്റെ ഭാഗത്തുള്ള ചുറ്റുമതിലാണ് ചൊവ്വാഴ്‌ച പുലർച്ചെ ആറുമണിയോടെ തകർന്നുവീണത്. മതിൽ തകർന്നുവീണത് റോഡിലേക്കായതിനാൽ അതുവഴിയുള്ള വാഹനഗതാഗതം ഏറെനേരം തടസ്സപ്പെട്ടു.

മണ്ണുമാന്തിയന്ത്രം എത്തി കല്ലും മണ്ണും റോഡിൽനിന്നു നീക്കംചെയ്തതിനു ശേഷമാണ് ഇതുവഴി വാഹനഗതാഗതം പുനഃസ്ഥാപിച്ചത്. മതിലിന്റെ ഒരുഭാഗം ഏതുനിമിഷവും നിലംപൊത്താവുന്ന രീതിയിൽ നിൽക്കുന്നത് സുരക്ഷാഭീഷണി സൃഷ്‌ടിക്കുന്നുണ്ട്. ഹോമിയോ ആശുപത്രിക്കുവേണ്ടി നിർമിക്കുന്ന പുതിയ കെട്ടിടത്തിനായി നീക്കിയ മണ്ണ് മതിലിനോടു ചാരിയിട്ടതാണ് മഴയിൽ മതിൽ തകരാൻ വഴിയൊരുക്കിയത്.