വളാഞ്ചേരിയിലെ ശിഹാബ് തങ്ങൾ ഡയാലിസിസ് കേന്ദ്രത്തിനു ധനസഹായം കൈമാറി നവദമ്പതിമാർ

വളാഞ്ചേരി : വിവാഹത്തിനു കരുതിവെച്ച സമ്പാദ്യത്തിൽനിന്ന് ഒരു വിഹിതം ഡയാലിസിസ് കേന്ദ്രത്തിനു സംഭാവനചെയ്ത് നവവധൂവരൻമാർ. വളാഞ്ചേരി വൈക്കത്തൂർ മാരാപറമ്പിൽ ഉസ്‌മാന്റെ മകൻ മുബീനും മലപ്പുറം ചെമ്മങ്കടവ് വള്ളിക്കാപറ്റ അബ്ദുസമദിന്റെ മകൾ സാറയുമാണ് കേന്ദ്രത്തിനായി ധനസഹായം നൽകിയത്. തിങ്കളാഴ്‌ചയായിരുന്നു ഇവരുടെ വിവാഹം.

വളാഞ്ചേരി നിസാർ ആശുപത്രിയിൽ പ്രവർത്തിക്കുന്ന ശിഹാബ് തങ്ങൾ ഡയാലിസിസ് കേന്ദ്രത്തിനാണ് വിവാഹദിനത്തിൽ വധൂവരൻമാർ സഹായം കൈമാറിയത്. കോവിഡ് നിയന്ത്രണങ്ങൾ കാരണം വിവാഹവുമായി ബന്ധപ്പെട്ട പല ചെലവുകളും ലഘൂകരിക്കാൻ സാധിച്ചതുകൊണ്ടാണ് ഈ സദുദ്യമം ചെയ്യാൻ കഴിഞ്ഞതെന്ന് മുബീൻ പറഞ്ഞു.

ഡയാലിസിസ് കേന്ദ്രത്തിനുവേണ്ടി നഗരസഭാധ്യക്ഷൻ അഷറഫ് അമ്പലത്തിങ്ങൽ സഹായധനം ഏറ്റുവാങ്ങി. ആരോഗ്യ സ്ഥിരംസമിതി അധ്യക്ഷൻ മാരാത്ത് ഇബ്രാഹിം, എം.പി. മുനീർ, കെ.പി. അസ്‌കർ അലവി, വി.ടി. റഫീഖ്, യാസർ അകയിൽ എന്നിവർ പങ്കെടുത്തു.