വി. അബ്‍ദുറഹിമാൻ എംഎൽഎ സഞ്ചരിച്ച കാറിൽ ബസിടിച്ചു
കോട്ടയ്ക്കൽ: താനൂർ എംഎൽഎ വി.അബ്‍ദുറഹിമാൻ സഞ്ചരിച്ച കാറിൽ സ്വകാര്യ ബസിടിച്ചു. ആർക്കും പരുക്കില്ല. എംഎൽഎയെ കൂടാതെ ഡ്രൈവറും സഹായിയുമാണ് വാഹനത്തിലുണ്ടായിരുന്നത്. ഇന്നലെ ഉച്ചയ്‍ക്കു ഒന്നോടെ ബസ് സ്‍റ്റാൻഡിനു മുന്നിൽവച്ചാണ് അപകടം. മലപ്പുറത്തേക്കു പോവുകയായിരുന്ന എംഎൽഎയുടെ കാറിന് പിന്നിൽ തിരൂരിൽനിന്നു മഞ്ചേരിയിലേക്കു പോകുന്ന ‘സൂപ്പർജെറ്റ്’ ബസ് ഇടിക്കുകയായിരുന്നു.
സീബ്രലൈനിലൂടെ യാത്രക്കാർ റോഡ് മുറിച്ചു കടക്കുന്നതു കണ്ടു കാർ നിർത്തിയതിനിടെയായിരുന്നു സംഭവം. അമിത വേഗത്തിലെത്തിയ സ്വകാര്യ ബസ് കാറിലിടിച്ചാണ് നിന്നത്. കാറിന്റെ പിറകിലെ ഗ്ലാസ് പൂർണമായി തകർന്നു. മഞ്ചേരിയിലേക്കുള്ള കെഎസ്ആർടിസി ബസുമായി മത്സരയോട്ടത്തിലായിരുന്നു ബസെന്ന് വി.അബ്‍ദുറഹിമാൻ എംഎൽഎ പറഞ്ഞു.
കാറിനെ അപകടകരമായ രീതിയിൽ മറികടക്കാൻ പലതവണ ശ്രമിച്ചതിനെത്തുടർന്ന് വഴിയിൽവച്ച് ബസ് ഡ്രൈവറെ നേരത്തേ താക്കീത് ചെയ്‍തിരുന്നതായും വീണ്ടും അമിത വേഗം തുടർന്നതാണ് അപകടത്തിന് ഇടയാക്കിയതെന്നും അദ്ദേഹം പറഞ്ഞു. എംഎൽഎയുടെ പരാതിയിൽ ബസ് ഡ്രൈവർ പൂക്കോട്ടൂർ തയ്യിൽ രതീഷി(37)നെതിരെ പൊലീസ് കേസെടുത്തു. അപകടത്തെ തുടർന്ന് സംസ്‍ഥാനപാതയിൽ കുറച്ചുനേരം ഗതാഗത തടസ്സമുണ്ടായി.
വളാഞ്ചേരി ഓൺലൈൻ വാർത്തകൾ വാട്സാപ്പിൽ ലഭിക്കാൻ Click Here.
വളാഞ്ചേരി ഓൺലൈൻ ഇപ്പോൾ ടെലഗ്രാമിലും ലഭ്യമാണ്. സബ്സ്ക്രൈബ് ചെയ്യൂ Click Here
