പൊട്ടിപ്പൊളിഞ്ഞു പൂക്കാട്ടിരി-വലിയകുന്ന് റോഡ്

എടയൂർ: എടയൂർ, ഇരിമ്പിളിയം പഞ്ചായത്തുകളെ യോജിപ്പിക്കുന്ന പൂക്കാട്ടിരി-വലിയകുന്ന് റോഡിന്റെ പല ഭാഗങ്ങളും തകർന്നു. എടയൂർ പഞ്ചായത്തിലെ എട്ടാം വാർഡിൽപ്പെട്ട ശ്രീസുബ്രഹ്മണ്യകോവിലിന് സമീപമാണ് വലിയ കുണ്ടും കുഴികളും രൂപപ്പെട്ടത്. കുഴികളിൽ വെള്ളം കെട്ടിനിൽക്കുന്നതിനാൽ വാഹനങ്ങളും കാൽനടക്കാരും ഏറെ പ്രയാസമനുഭവിക്കുന്നുണ്ട്.

കുഴമ്പുരൂപത്തിലുള്ള ചെളി തെറിക്കുന്നതാണ് ഏറെ ദുരിതം. ഇരിമ്പിളിയം, വലിയകുന്ന് ഭാഗങ്ങളിൽനിന്ന് രോഗികളുമായി പെരിന്തൽമണ്ണയിലേക്ക് പോകാൻ നാട്ടുകാർ ഈ റോഡാണ് ആശ്രയിക്കുന്നത്. കുടിവെള്ള പദ്ധതിയുടെ വെള്ളക്കുഴലിടാൻ കീറിയ ചാലുകൾ നേരേയാക്കാത്തതിനാൽ റോഡിൽ ഇപ്പോൾ വലിയ കുഴികളായിട്ടുണ്ട്.