കഞ്ഞിപ്പുര-മൂടാൽ ബൈപ്പാസിനോട് അവഗണന; എം.എൽ.എ.മാരുടെ നേതൃത്വത്തിൽ ഇന്ന് മൂടാലിൽ ഉപവാസസമരം

വളാഞ്ചേരി : കഞ്ഞിപ്പുര-മൂടാൽ ബൈപ്പാസ് നിർമാണത്തിൽ സംസ്ഥാന സർക്കാർ അവഗണന തുടരുകയാണെന്നും ഒരു നാടിനേയും അവിടുത്തെ ജനങ്ങളേയും പരിഹസിക്കുകയാണെന്നും ആരോപിച്ച് ജനകീയ പ്രക്ഷോഭത്തിനൊരുങ്ങി യു.ഡി.എഫ്. സമരത്തിന്റെ ആദ്യഘട്ടത്തിൽ ബൈപ്പാസ് കടന്നുപോകുന്ന കോട്ടയ്ക്കൽ, തിരൂർ മണ്ഡലങ്ങളെ പ്രതിനിധീകരിക്കുന്ന ആബിദ് ഹുസൈൻ തങ്ങൾ, കുറുക്കോളി മൊയ്തീൻ എന്നീ എം.എൽ.എ.മാരും ജനപ്രതിനിധികളും വ്യാഴാഴ്ച രാവിലെ പത്തിന് മൂടാലിൽ ഉപവസിക്കും. പ്രതിപക്ഷനേതാവ് വി.ഡി. സതീശൻ, പ്രതിപക്ഷ ഉപനേതാവ് പി.കെ. കുഞ്ഞാലിക്കുട്ടി, ഇ.ടി. മുഹമ്മദ് ബഷീർ എം.പി, കെ.പി.സി.സി. വൈസ് പ്രസിഡന്റ് വി.ടി. ബൽറാം, ജില്ലയിൽനിന്നുള്ള യു.ഡി.എഫ്. എം.എൽഎ.മാർ തുടങ്ങിയവർ സമരത്തെ അഭിവാദ്യംചെയ്യുമെന്ന് ബന്ധപ്പെട്ടവർ അറിയിച്ചു.