കുത്തിവെപ്പിനെത്തുടർന്നുള്ള മരണം:മെഡിക്കൽസംഘം പരിശോധന നടത്തി

കുറ്റിപ്പുറം : അലർജിക്ക് കുത്തിവെപ്പ് എടുത്തതിനെത്തുടർന്ന് കാങ്കപ്പുഴ കടവ് സ്വദേശി തോണിക്കടവത്ത് സബാഹിന്റെ ഭാര്യ ഹസ്ന മരിച്ച സംഭവത്തിൽ ജില്ലാ മെഡിക്കൽ സംഘം കുറ്റിപ്പുറം ഗവ. താലൂക്ക് ആശുപത്രിയിലെത്തി തെളിവെടുപ്പ് നടത്തി.

ജില്ലാ ഡെപ്യൂട്ടി മെഡിക്കൽ ഓഫീസർ ഡോ. മുഹമ്മദ് ഇസ്മയിലിന്റെ നേതൃത്വത്തിലുള്ള സംഘമാണ് തെളിവെടുപ്പിനെത്തിയത്. യുവതിയെ ചികിത്സിച്ച ഡോക്ടറുടെ മൊഴി രേഖപ്പെടുത്തുകയും ചികിത്സയുമായി ബന്ധപ്പെട്ട രേഖകൾ പരിശോധിക്കുകയും ചെയ്തു. ഉച്ചയോടെ യുവതിയുടെ വീട്ടിലെത്തിയ സംഘം ബന്ധുക്കളിൽനിന്ന്‌ വിവരങ്ങൾ ശേഖരിച്ചു. റിപ്പോർട്ട് ഉടനെ ജില്ലാ മെഡിക്കൽ ഓഫീസർക്ക് കൈമാറുമെന്ന് സംഘം അറിയിച്ചു. മരണം സംബന്ധിച്ച് തിരൂർ ഡിവൈ.എസ്.പി. ബെന്നിയുടെ നേതൃത്വത്തിലുളള സംഘവും അന്വേഷണം നടത്തുന്നുണ്ട്.