കുറ്റിപ്പുറം ചെമ്പിക്കലിൽ തീവണ്ടിതട്ടി യുവാവിന് പരിക്ക്

കുറ്റിപ്പുറം : തീവണ്ടിതട്ടി യുവാവിന്റെ ഒരു കാൽമുട്ടിന് താഴെ മുറിഞ്ഞു. കുറ്റിപ്പുറം ദേശീയപാതയിലെ ഹീൽ ഫോർട്ട് ആശുപത്രിക്കു സമീപം ഇറക്കിൽ പരമേശ്വരന്റെ മകൻ രോഹിത്തിനാണ്‌(24) അപകടത്തിൽ ഇടതു കാലിന്റെ മുട്ടിനു താഴെ നഷ്ടമായത്. ഞായറാഴ്ച പുലർച്ചെ 3.30-ന് ചെമ്പിക്കൽ ലെവൽ ക്രോസിന് സമീപത്തായാണ് രോഹിത്തിനെ അപകടത്തിൽപ്പെട്ട നിലയിൽ കണ്ടെത്തിയത്. നിലവിളി കേട്ട് ഓടിയെത്തിയ ലെവൽ ക്രോസിലെ ജീവനക്കാരനാണ് രോഹിത്തിനെ പാളത്തിനു സമീപത്തുനിന്ന്‌ ചുമന്ന് റോഡിലെത്തിച്ചത്. രോഹിത്ത് കോഴിക്കോട്ടെ സ്വകാര്യ ആശുപത്രിയിൽ തീവ്രപരിചരണവിഭാഗത്തിൽ ചികിത്സയിലാണ്. യു.എ.ഇ.യിൽ ജോലിചെയ്യുന്ന രോഹിത്ത് ഒരാഴ്ച മുൻപാണ് നാട്ടിലെത്തിയത്.