രേഖകളില്ലാത്ത 60 പവൻ സ്വർണാഭരണം കുറ്റിപ്പുറത്ത് പിടികൂടി

കുറ്റിപ്പുറം: കോഴിക്കോട്ടുനിന്ന് തൃശ്ശൂരിലേക്ക് പോവുകയായിരുന്ന സ്വകാര്യ ബസ്സിലെ യാത്രക്കാരനിൽനിന്ന് മതിയായ രേഖകളില്ലാതെ കൊണ്ടുപോവുകയായിരുന്ന 60 പവനോളം സ്വർണാഭരണങ്ങൾ പിടിച്ചെടുത്തു. പി.കെ. ഖാലിദിന്റെ നേതൃത്വത്തിലുള്ള സ്റ്റാറ്റിക് സർവേലൻസ് സംഘമാണ് കുറ്റിപ്പുറം ബസ്‌സ്റ്റാൻഡിൽ നടത്തിയ പരിശോധനയിൽ സ്വർണം പിടിച്ചെടുത്തത്.

ഹാൾമാർക്ക് ചെയ്യാൻ കൊണ്ടുപോവുകയാണെന്നാണ് യാത്രക്കാരൻ പറഞ്ഞതെങ്കിലും ഇതുസംബന്ധിച്ച രേഖകൾ കൈവശം ഇല്ലാതിരുന്നതിനാലാണ് സ്വർണം പിടികൂടിയത്. ടി.എം. സതീശൻ, കെ.വി. ജിതേഷ്, അലക്സ് വർഗീസ്, പി.കെ. രാജേഷ്, അഫ്‌സൽ അന്നത്ത് എന്നിവരാണ് സംഘത്തിലുണ്ടായിരുന്നത്. സ്വർണം വളാഞ്ചേരി സബ് ട്രഷറി ഓഫീസർക്ക് കൈമാറി.