കുറ്റിപ്പുറം പഞ്ചായത്ത് പ്രസിഡൻ്റായി കോൺഗ്രസിലെ ഫസീന അഹമ്മദ്കുട്ടിയെ തിരഞ്ഞെടുത്തു

കുറ്റിപ്പുറം: യുഡിഎഫ് ഭരിക്കുന്ന കുറ്റിപ്പുറം പഞ്ചായത്തിൽ ഇനി പ്രസിഡന്റ് സ്ഥാനം കോൺഗ്രസിലെ ഫസീന അഹമ്മദ്കുട്ടിക്ക്. കഴിഞ്ഞ ഭരണസമിതിയിൽ പഞ്ചായത്ത് പ്രസിഡന്റായിരുന്ന ഫസീല ഇരുപതാം വാർഡിൽ നിന്നുള്ള അംഗമാണ്. രാവിലെ 11ന് പഞ്ചായത്ത് ഹാളിലായിരുന്നു തിരഞ്ഞെടുപ്പ്. പഞ്ചായത്ത് പ്രസിഡന്റായിരുന്ന കെ.റംലയുടെ (മുസ്‌ലിം ലീഗ്) നിര്യാണത്തെ തുടർന്നാണ് തിരഞ്ഞെടുപ്പ് വേണ്ടി വന്നത്. തിരഞ്ഞെടുപ്പ് കുറ്റിപ്പുറം സബ് റജിസ്ട്രാർ നിയന്ത്രിച്ചു. പ്രസിഡന്റ് സ്ഥാനത്തെച്ചൊല്ലി കോൺഗ്രസിൽ വിഭാഗീയത നിലനിൽക്കുന്നുണ്ട്. കഴിഞ്ഞ ദിവസം നടന്ന പാർട്ടി യോഗത്തിൽ കോൺഗ്രസിലെ റിജിത ഷലീജിനെ പ്രസിഡന്റ് സ്ഥാനത്തേക്ക് ഒരു വിഭാഗം നേതാക്കൾ ചൂണ്ടിക്കാട്ടിയിരുന്നു. തർക്കത്തെ തുടർന്ന് ഇരുവർക്കും പ്രസിഡന്റ് സ്ഥാനം നൽകാം എന്ന നിലപാടാണ് കോൺഗ്രസ് നേതൃത്വം എടുത്തിട്ടുള്ളത്. കോൺഗ്രസിന് ലഭിക്കുന്ന കാലാവധി ഇരുവർക്കും വീതിച്ചുനൽകാനാണ് തീരുമാനം.