ദിവ്യ ജ്യോതി പ്രയാണത്തിന് വട്ടപ്പാറയിൽ സ്വീകരണം നൽകി

വളാഞ്ചേരി: എൺപത്തിയറാമത് ശിവഗിരി തീർത്ഥാടനവേദിയിൽ ജ്വലിപ്പിക്കുന്നതിനുളള ദിവ്യ ജ്യോതി പ്രയാണത്തിന് എസ്.എൻ.ഡി.പി യോഗം തിരൂർ യൂണിയന്റെ നേതൃത്വത്തിൽ വളാഞ്ചേരി വട്ടപ്പാറ ഓഫീസിൽ വച്ച് സ്വീകരണം നൽകി. ശ്രീനാരായണ ഗുരുദേവനാൽ പ്രതിഷ്ഠാപിതമായ കോഴിക്കോട് ശ്രീകണ്ഠേശ്വര ക്ഷേത്രത്തിൽ നിന്നാണ് ജ്യോതി പ്രയാണം ആരംഭിച്ചത്. വിവിധ ജില്ലകളിൽ നിന്നും ശ്രീനാരായണപ്രസ്ഥാനങ്ങളുടെ സ്വീകരണം ഏറ്റുവാങ്ങി ഡിസംബർ 29 വൈകിട്ട് അഞ്ച് മണിക്ക് ദിവ്യജ്യോതി ശിവഗിരി മഠത്തിൽ എത്തിച്ചേരും. 30,31, ജനുവരി 1 തീയതികളിലാണ് തീർത്ഥാടനം. ദിവ്യജ്യോതി പ്രയാണത്തിൻറ ചെയർമാനും ജാഥാ ക്യാപ്റ്റനുമായ അനിരുദ്ധൻ എഴുത്ത്പളളി, അനിൽ കുമാർ കേലാട്ട്, ഗുരുധർമ്മപ്രചാരസഭ കേന്ദ്രകമ്മിറ്റി അംഗവും ദിവ്യജ്യോതിയുടെ വൈസ് ക്യാപ്റ്റനുമായ പി.പി രാമനാഥൻ, മറ്റ് ക്ഷേത്രം ഭാരവാഹികൾ, ക്ഷേത്രം ശാന്തി ഷിബു എന്നിവരും ദിവ്യജ്യോതി പ്രയാണത്തെ അനുഗമിക്കുന്നു. തിരൂർ യൂണിയൻ നൽകിയ സ്വീകരണത്തിൽ വനിതാസംഘം സെക്രട്ടറി ബിന്ദു മണികണ്ഠൻ, മോഹനൻ, ശിവദാസ്, ബാബു, മണികണ്ഠൻ തുടങ്ങിയവർ നേതൃത്വം നൽകി.