കുറ്റിപ്പുറം പുതിയ പാലം : അവസാന പില്ലറുകളുടെ നിർമാണം ആരംഭിച്ചു

കുറ്റിപ്പുറം : ആറുവരിപ്പാതാ നിർമാണത്തിന്റെ ഭാഗമായി കുറ്റിപ്പുറം ഭാരതപ്പുഴയിൽ നിർമിക്കുന്ന പുതിയ പാലത്തിന്റെ അവസാന പില്ലറുകളുടെ നിർമാണം ആരംഭിച്ചു. മല്ലൂർക്കടവ് ഭാഗത്തു നിന്നുള്ള പില്ലറുകളുടെ നിർമാണമാണ് ഇപ്പോൾ നടക്കുന്നത്. പുഴയിലെ ജലമൊഴുക്ക് തിരിച്ചുവിട്ടാണ് പില്ലർ നിർമാണം നടക്കുന്നത്. പുഴയിലെ പ്രധാന നീരൊഴുക്ക് മല്ലൂർക്കടവ് ഭാഗത്തുകൂടിയാണ്. പുഴയിലെ നീരൊഴുക്ക് കുറഞ്ഞതിനെത്തുടർന്ന് നീരൊഴുക്കിന്റെ ഗതിമാറ്റിയ ശേഷമാണ് മല്ലൂർക്കടവിലെ നിർമാണം ആരംഭിച്ചത്.
പുഴയുടെ കിഴക്കുഭാഗത്തെ പില്ലർ നിർമാണം പൂർത്തിയായതിനെത്തുടർന്ന് വശങ്ങളിലെ കൂറ്റൻ ബീമുകൾ സ്ഥാപിക്കുന്ന പ്രവൃത്തിയും നടന്നുവരികയാണ്. 500 മീറ്റർ നീളംവരുന്ന പാലത്തിന് 32 മീറ്ററാണ് വീതി. പാലത്തിന്റെ രണ്ടു ഭാഗങ്ങളിലായി ഒന്നരമീറ്റർ വീതിയിൽ രണ്ട്‌ നടപ്പാതകളും നിർമിക്കും. 28 പില്ലറുകളാണ് പാലത്തിന് ആകെയുള്ളത്.