ഭിന്നശേഷിക്കാർക്ക് പുതുവത്സര സമ്മാനമായി പുതപ്പുകൾ നൽകി മാറാക്കര ഗ്രാമപ്പഞ്ചായത്ത്

മാറാക്കര: മാറാക്കര ഗ്രാമപ്പഞ്ചായത്തിലെ മുഴുവൻ ഭിന്നശേഷിക്കാർക്കും പുതുവത്സര സമ്മാനം നൽകി പഞ്ചായത്ത് ഭരണസമിതി. വിദേശനിർമിത പുതപ്പുകൾ നൽകിയാണ് ഭരണസമിതി ഭിന്നശേഷിക്കാരെ ചേർത്തുനിർത്തിയത്. ഗ്രാമപ്പഞ്ചായത്ത് പ്രസിഡന്റ് ഇൻചാർജ് ഉമറലി കരേക്കാട് വിതരണോദ്ഘാടനം നിർവഹിച്ചു. ക്ഷേമകാര്യ സ്ഥിരംസമിതി അധ്യക്ഷൻ ഒ.പി. കുഞ്ഞിമുഹമ്മദ് അധ്യക്ഷതവഹിച്ചു. സ്ഥിരംസമിതി അധ്യക്ഷരായ ശരീഫാ ബഷീർ, പാമ്പലത്ത് നജ്മത്ത്, മുൻ പ്രസിഡന്റ് ടി.പി. സജ്‌ന, അംഗങ്ങളായ എ.പി. ജാഫറലി, റാബിയ, മുഫീദാ അൻവർ, ശ്രീഹരി, റഷീദ് പാറമ്മൽ, സജിത, ആബിദ് കല്ലാർമംഗലം, കെ.പി. നാസർ തുടങ്ങിയവർ പങ്കെടുത്തു. മുഴങ്ങാണി അങ്കണവാടിക്ക് സ്ഥലം വാങ്ങാൻ പണവും ഭിന്നശേഷിക്കാരുടെ ക്ഷേമത്തിന് പിന്തുണയും നൽകിയ കെ.സി. അസീസ് പിലാത്തറയെ ആദരിച്ചു.