സി.കെ. പാറ നൈതലപ്പുറം ധർമശാസ്താക്ഷേത്രത്തിലെ അഖണ്ഡനാമജപയജ്ഞം നാളെ

എടയൂർ: വടക്കുംപുറം സി.കെ. പാറ നൈതലപ്പുറം ധർമശാസ്താക്ഷേത്രത്തിലെ അഖണ്ഡനാമജപയജ്ഞം ബുധനാഴ്ച ആഘോഷിക്കും. അഷ്ടദ്രവ്യഗണപതിഹോമം, കലശപൂജ, കലശാഭിഷേകം തുടങ്ങിയ ചടങ്ങുകൾക്ക് മേപ്പാട്ടില്ലത്ത് ശാസ്തൃശർമൻ കാർമികത്വം വഹിക്കും. മേപ്പാട്ടില്ലത്ത് വിഷ്ണുശർമൻ, കാടാമ്പുഴ അപ്പൂസ് എമ്പ്രാന്തിരി, നീലമന ആദിത്യദേവ് എന്നിവർ വിശേഷാൽ പൂജകൾ, അഖണ്ഡപുഷ്പാഞ്ജലി, നിറമാല, ചുറ്റുവിളക്ക് എന്നിവയ്ക്ക് കാർമികത്വം വഹിക്കും. ഗുരുസ്വാമി പുന്നപ്പുറത്ത് മോഹനനും സംഘവും അഖണ്ഡനാമജപവും സന്ധ്യയ്ക്ക് കർപ്പൂരാട്ടവും നടത്തും. പ്രാതലും പ്രസാദഊട്ടുമുണ്ട്. ചൊവ്വാഴ്ച രാവിലെ ഏഴിന് കലവറ നിറയ്ക്കൽ തുടങ്ങും.