സഹോദരന്റെ വിവാഹം ക്ഷണിക്കാൻ പോയ യുവാവ് ടിപ്പർ ലോറിയിടിച്ച് മരിച്ചു

വലിയകുന്ന് അയ്യപ്പക്ഷേത്രത്തിനടുത്ത് ബൈക്കിൽ ടിപ്പർലോറിയിടിച്ച് യുവാവ് മരിച്ചു. വലിയകുന്ന് കരുവത്തൊടി മേലേതിൽ അനിൽ‌കുമാർ (35) ആണ് മരിച്ചത്. ബൈക്കിൽ കൂടെ യാത്ര ചെയ്യുകയായിരുന്ന സഹോദരൻ അനൂപിനെ (30) ഗുരുതര പരിക്കുകളോടെ പെരിന്തൽമണ്ണ അൽ‌ശിഫ അസ്പത്രിയിൽ പ്രവേശിപ്പിച്ചു. വലിയകുന്ന് പൂക്കാട്ടിരി റോഡിൽ തിങ്കളാഴ്ച രാത്രി 10:15നായിരുന്നു സംഭവം.

ജനുവരി 26ന് നടക്കാനിരുന്ന അനൂപിന്റെ വിവാഹത്തിന് ക്ഷണിക്കുവാൻ ബന്ധു‌വീടുകളിൽ പോയി മടങ്ങുന്നതിനിടെയാണ് അപകടമുണ്ടായത്. അനിൽകുമാർ ആയിരുന്നു ബൈക്ക് ഓടിച്ചിരുന്നത്. വീടിനടുത്ത് വച്ചായിരുന്നു അപകടം നടന്നത്. അമിതവേഗതയിലെത്തിയ ടിപ്പർ ലോറി ബൈക്കിനെ തട്ടിത്തെറിപ്പിക്കുകയായിരുന്നു. അപകടം നടന്നയുടനെ ടിപ്പർ ലോറിയിലുണ്ടായിരുന്നവർ ഓടി രക്ഷപ്പെട്ടു. വളാഞ്ചേരി പോലീസ് കേസ്സെടുത്തു.

അനിൽകുമറിന്റെ മൃതദേഹം ബുധനാഴ്ച രാവിലെ എട്ടു മണിക്ക് ഷൊറണൂർ ശാന്തിതീരത്ത് സംസ്കരിക്കും.

പരേതനായ അച്യുതന്റേയും ലക്ഷ്മിക്കുട്ടിയുടേയും മകനാണ് അനിൽകുമാർ. സുജാതയാണ് ഭാര്യ. മക്കൾ: അഞ്ജന, ശ്രീലക്ഷ്മി.