തലയ്ക്കടിച്ചും ദേഹോപദ്രവം ചെയ്തും മോഷണം നടത്തുന്ന എട്ടംഗസംഘത്തെ കാടാമ്പുഴ പോലീസ് അറസ്റ്റ് ചെയ്തു.

വളാഞ്ചേരി: വീട്ടുകാരെ തലയ്ക്കടിച്ചും ദേഹോപദ്രവം ചെയ്തും മോഷണം നടത്തുന്ന എട്ടംഗസംഘത്തെ കാടാമ്പുഴ പോലീസ് അറസ്റ്റ് ചെയ്തു. തമിഴ്‌നാട് സേലം സ്വദേശിയും ഇപ്പോള്‍ കോഴിക്കോട് വെസ്റ്റ്ഹില്ലില്‍ താമസക്കാരനുമായ രാജന്‍ (33), സേലം റെയില്‍വേസ്റ്റേഷന്‍ പുറമ്പോക്ക് ഭൂമിയിലെ താമസക്കാരായ ചന്ദ്രന്‍ എന്ന ഭഗവതി (39), കുമാര്‍ (31), നാഗരാജന്‍ (25), മുത്തപ്പന്‍ (20), മാതു (35), മാണിക്യം (26), തമിഴ്‌നാട് കമ്പം തേനി മാവട്ടം മഹേശ്വരന്‍ (42) എന്നിവരാണ് അറസ്റ്റിലായത്. ബുധനാഴ്ച പുലര്‍ച്ചെയായിരുന്നു അറസ്റ്റ്. ഇവര്‍ക്കെതിരെ ചാവക്കാട്, മതിലകം, തൃശ്ശൂര്‍ വെസ്റ്റ്, കുന്ദംകുളം, വാടാനപ്പള്ളി, അക്കിക്കാവ് സ്റ്റേഷനുകളില്‍ ക്രിമിനല്‍ കേസ്സുകള്‍ നിലവിലുണ്ട്. പലരും മൂന്ന് വര്‍ഷം വരെ ജയില്‍ വാസം അനുഭവിച്ചവരുമാണ്.

അടുത്ത കാലത്താണ് എട്ടംഗസംഘം കാടാമ്പുഴക്കടുത്ത് പിലാത്തറയില്‍ താമസം തുടങ്ങിയത്. കുടുംബസമേതം സ്വകാര്യവ്യക്തിയുടെ വാടകക്വാര്‍ട്ടേഴ്‌സിലായിരുന്നു ഇവരുടെ താമസം. നാട്ടുകാര്‍ക്കിടയില്‍ ഇവരെക്കുറിച്ച് സംശയമുണ്ടായിരുന്നു. പ്രതികളുടെ നീക്കങ്ങള്‍ നിരീക്ഷിച്ച നാട്ടുകാരുടെ ശ്രമഫലമായാണ് ഇവരെ കുടുക്കാനായത്. ബുധനാഴ്ച പുലര്‍ച്ചെ മൂന്നിന് കളവിനുള്ള പദ്ധതിയുമായി നീങ്ങുന്ന ഇവരെക്കുറിച്ച് നാട്ടുകാര്‍ പോലീസിന് വിവരം നല്‍കുകയായിരുന്നു. എസ്.ഐ. ശിവദാസന്‍, അഡീഷണല്‍ എസ്.ഐ. കെ.പി. വാസു, പോലീസുകാരായ ജയപ്രകാശ്, ചന്ദ്രന്‍, രാജന്‍ എന്നിവര്‍ ചേര്‍ന്നാണ് മോഷണ സംഘത്തെ പിടികൂടിയത്. എട്ടംഗസംഘത്തെ തിരൂര്‍ കോടതിയില്‍ ഹാജരാക്കി.

Summary:8 interstate thieves has benn nabbed by the police at Kadampuzha.