മലയാളികൾക്ക് ഇനി വെറും 207 രൂപയ്ക്ക് മൈസൂരിലെത്തിച്ചേരാം!

മലപ്പുറം: ഇനി 207 രൂപയ്ക്ക് മലപ്പുറത്തുനിന്ന് മൈസൂരിലേക്ക് കെ.എസ്.ആര്‍.ടി.സിയില്‍ കാനനഭംഗി ആസ്വദിച്ച് യാത്രചെയ്യാം. പുതിയ മലപ്പുറം-മൈസൂര്‍ സൂപ്പര്‍ ഫാസ്റ്റ് സര്‍വീസ് പി. ഉബൈദുള്ള എം.എല്‍.എ. ഉദ്ഘാടനംചെയ്തു. ഇന്ന് രാവിലെ 5.40 ന് മലപ്പുറം ഡിപ്പോയില്‍നിന്ന് ബസിന്റെ ആദ്യ സര്‍വീസ് ആരംഭിച്ചു.

ഉച്ചയ്ക്ക് 12.15 ന് ബസ് മൈസൂരിലെത്തും. അവിടുന്ന് 2.15ന് പുറപ്പെടുന്ന വണ്ടി രാത്രി 8.55 ന് മലപ്പുറത്ത് തിരിച്ചെത്തും. നിലവില്‍ ബസിന് ബുക്കിങ് ആരംഭിച്ചിട്ടില്ല. ഇത് ഉടന്‍ തുടങ്ങുമെന്ന് അധികൃതര്‍ പറഞ്ഞു. മൈസൂര്‍ സര്‍വീസ് ആരംഭിക്കുന്നതോടെ മലപ്പുറം ഡിപ്പോയില്‍നിന്ന് രണ്ട് സര്‍വീസുകള്‍ അന്യ സംസ്ഥാനത്തിലേക്ക് പോകും. ഊട്ടി സര്‍വീസാണ് മറ്റൊന്ന്. ബെംഗളൂരുവിലേക്ക് സര്‍വീസ് ഉണ്ടായിരുന്നുവെങ്കിലും മൂന്നുവര്‍ഷംമുന്‍പ് ഇത് നിര്‍ത്തിയിരുന്നു.

മഞ്ചേരി, അരീക്കോട്, താമരശ്ശേരി, സുല്‍ത്താന്‍ബത്തേരി വഴിയാണ് ബസ് ഓടുക. ഡി.ടി.ഒ. കെ.പി. രാധാകൃഷ്ണന്‍, നഗരസഭാധ്യക്ഷ സി.എച്ച്. ജമീല, ആലീസ് മാത്യു, ഹാരിസ് ആമിയന്‍ തുടങ്ങിയവര്‍ പങ്കെടുത്തു.