മന്ത്രി കെ.ടി.ജലീൽ രാജിവെക്കണം എന്നാവശ്യപ്പെട്ട് എം.എസ്.എഫ് വളാഞ്ചേരിയിൽ വിദ്യാർത്ഥി രോഷം സംഘടിപ്പിച്ചു

വളാഞ്ചേരി: മന്ത്രി കെ.ടി.ജലീല്‍ നന്മയുടെ പൂമരമല്ല; തിന്മകളുടെ വിഷവൃക്ഷമാണെന്ന് എം.എസ്.എഫ് സംസ്ഥാന പ്രസിഡന്റ് പി.കെ.നവാസ് പറഞ്ഞു. സ്വർണ്ണക്കടത്ത് കേസിൽ എൻ.ഐ.എയും ഇ.ഡിയും ചോദ്യം ചെയ്ത മന്ത്രി കെ.ടി.ജലീൽ രാജിവെക്കണം എന്നാവശ്യപ്പെട്ട് എം.എസ്.എഫ് സംസ്ഥാന കമ്മിറ്റി ആഹ്വാനം ചെയ്ത വിദ്യാർത്ഥി രോഷം പ്രതിഷേധ പരിപാടിയുടെ മലപ്പുറം ജില്ലാതല ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. ആദർശത്തിന്റെ അപ്പോസ്തലനായി വേഷം കെട്ടി ഒരു മുടിനാരിഴപോലും സത്യം പറയാതെ നുണ ഫാക്ടറിയുടെ ബ്രാൻഡ് അംബാസിഡറായ മന്ത്രി ജലീൽ പ്രബുദ്ധ കേരളത്തിന് അപമാനമാണെന്നും അദ്ദേഹം കുറ്റപ്പെടുത്തി. അധികാരം മനുഷ്യനെ ദുഷിപ്പിക്കും, പരമാധികാരം പരമമായി ദുഷിപ്പിക്കും എന്നതിൻ്റെ തെളിവാണ് കേരളത്തിൻ്റെ ഉന്നത വിദ്യാഭ്യാസ വകുപ്പ് മന്ത്രി കെ.ടി.ജലീലെന്നും അദ്ദേഹം കൂട്ടിച്ചേർത്തു. ജില്ലാ തലത്തിൽ തുടക്കം കുറിച്ച വിദ്യാർത്ഥി രോഷം പ്രതിഷേധ പരിപാടി നാളെ ജില്ലയിലെ വിവിധ നിയോജക മണ്ഡലം കേന്ദ്രങ്ങളിൽ നടത്തപ്പെടുന്നതാണ്.

എം.എസ്.എഫ് ജില്ലാ പ്രസിഡന്റ് കബീർ മുതുപറമ്പ് അദ്ധ്യക്ഷത വഹിച്ചു. മുസ്‌ലിംലീഗ് ജില്ലാ സെക്രട്ടറി കെ.എം.ഗഫൂർ മുഖ്യപ്രഭാഷണം നിർവ്വഹിച്ചു. മുസ്‌ലിംലീഗ് കോട്ടക്കൽ മണ്ഡലം പ്രസിഡന്റ് സി.എച്ച്. അബൂയൂസുഫ് ഗുരുക്കൾ, എം.എസ്.എഫ് സംസ്ഥാന സെക്രട്ടറി അഷ്ഹർ പെരുമുക്ക്, പ്രവാസിലീഗ് സംസ്ഥാന സെക്രട്ടറി സലാം വളാഞ്ചേരി, എം.എസ്.എഫ് ജില്ലാ ജനറൽ സെക്രട്ടറി വി.എ.വഹാബ്, ട്രഷറർ പി.എ.ജവാദ്, സീനിയർ വൈസ്പ്രസിഡന്റ് കെ.എൻ.ഹക്കീം തങ്ങൾ, ഭാരവാഹികളായ അഡ്വ: ഖമറുസമാൻ മൂർക്കത്ത്, കെ.എം.ഇസ്മായിൽ, ടി.പി.നബീൽ, റാഷിദ് കൊക്കൂർ, ജില്ലാ കമ്മിറ്റി അംഗങ്ങളായ അഡ്വ: ഒ.പി.റഊഫ്, ഫഹദ് കരേക്കാട്, നദീം ഒള്ളാട്ട്, മുസ്‌ലിം യൂത്ത്ലീഗ് മണ്ഡലം പ്രസിഡന്റ് എം.പി.ഇബ്രാഹിം മാസ്റ്റർ, ജനറൽ സെക്രട്ടറി അഡ്വ:പി.പി.ഹമീദ്, വളാഞ്ചേരി മുനിസിപ്പൽ പ്രസിഡന്റ് സി.എം.റിയാസ്, ജനറൽ സെക്രട്ടറി മുജീബ് വാലാസി, എം.എസ്.എഫ് മണ്ഡലം കമ്മിറ്റി അംഗങ്ങളായ കെ.പി.അൻവർ സാദാത്ത്, പി.ടി.റാഷിദ്, സഫ്‌വാൻ മാരാത്ത്, സൈൻ സഖാഫ് തങ്ങൾ, ഹക്കീം പൈങ്കണ്ണൂർ, ആഷഖ് കോൽക്കളം എന്നവർ സംബന്ധിച്ചു.