രാഷ്ട്രീയവിശദീകരണ യോഗത്തിൽ ഒന്നരമണിക്കൂർ പ്രസംഗത്തിൽ ജലീലിനെ തൊടാതെ മുഖ്യമന്ത്രി

മലപ്പുറം: രാഷ്ട്രീയവിശദീകരണയോഗത്തിൽ ഒന്നരമണിക്കൂറോളം പ്രസംഗിച്ചിട്ടും ജില്ലയിലെ മന്ത്രിയായ കെ.ടി. ജലീൽ നേരിടുന്ന ആരോപണവിഷയത്തിൽ തൊടാതെ മുഖ്യമന്ത്രി. സ്വകാര്യ പരിപാടികളിലടക്കം ജലീലിനെ യൂത്ത്‌ലീഗും യു.ഡി.എഫും തടയുന്നതിനെ വിമർശിച്ച് കഴിഞ്ഞ ദിവസം സി.പി.എം.ജില്ലാ നേതൃത്വം രംഗത്തുവന്നിരുന്നു. പിണറായി വിജയൻ ഇതിനെ എങ്ങനെ നിരീക്ഷിക്കുന്നുവെന്ന്‌ അറിയാൻ എത്തിയ അണികളാണ് പ്രസംഗത്തിൽ നിരാശരായത്.

പിണറായിക്കുശേഷമായിരുന്നു കെ.ടി. ജലീലിന്റെ പ്രസംഗം. തനിക്കുനേരേയുള്ള യൂത്ത്‌ലീഗിന്റെ ആരോപണം അദ്ദേഹം തള്ളിക്കളയുകയുംചെയ്തു. സ്വാഗതപ്രസംഗകനായ വി.പി. അനിൽ മാത്രമാണ് ജലീൽ വിഷയത്തിൽ സംസാരിച്ചത്. പിന്നീട് പ്രസംഗിച്ച എൽ.ഡി.എഫ്. കൺവീനർ എ. വിജയരാഘവനും മുൻമന്ത്രി ടി.കെ. ഹംസയും ജലീലിനെപ്പറ്റി ഒരക്ഷരം മിണ്ടിയില്ല.