വൈരങ്കോട് ക്ഷേത്രത്തിനു സമീപം ജില്ലാപഞ്ചായത്ത് നിർമിക്കുന്ന ഊട്ടുപുരയ്ക്കുള്ള സ്ഥലം ജനപ്രതിനിധികളും ഉദ്യോഗസ്ഥരും സന്ദർശിച്ചു

തിരുനാവായ : വൈരങ്കോട് ഭഗവതീക്ഷേത്രത്തിനു സമീപം ജില്ലാപഞ്ചായത്ത് വാർഷികപദ്ധതിയിൽ ഉൾപ്പെടുത്തി അൻപതുലക്ഷം രൂപയിൽ നിർമിക്കുന്ന ഊട്ടുപുരയ്ക്കുള്ള സ്ഥലം ജനപ്രതിനിധികളും ഉദ്യോഗസ്ഥരും സന്ദർശിച്ചു. ഭക്ഷണശാലയ്ക്കുപുറമെ ആവശ്യമായ ഫർണിച്ചറുകളും അനുബന്ധ സംവിധാനങ്ങളുമൊരുക്കും. ജില്ലാപഞ്ചായത്ത് ആരോഗ്യ വിദ്യാഭ്യാസ സ്റ്റാൻഡിങ് കമ്മിറ്റി ചെയർപേഴ്സൺ മയ്യേരി നസീബ അസീസിന്റെ നേതൃത്വത്തിൽ സ്ഥലം സന്ദർശിച്ചു.

തിരൂർ ബ്ലോക്ക്പഞ്ചായത്തംഗം ടി.വി. റംഷീദ, വാർഡംഗം കെ. ഉണ്ണിക്കൃഷ്ണൻ, മുൻ ജില്ലാപഞ്ചായത്തംഗം വെട്ടം ആലിക്കോയ, സിഡ്കോ എക്സിക്യുട്ടീവ് എൻജിനീയർ പി. മുഹമ്മദ് ബഷീർ, എം. ജംഷീദ് അലി, ക്ഷേത്രം മാനേജർ മുരളി വള്ളത്തോൾ, പി. അബ്ദു, ബക്കർ അമരിയിൽ എന്നിവർ പങ്കെടുത്തു.