കരിപ്പൂരിൽ തകർന്ന വിമാനത്തിന്റെ ഭാഗങ്ങൾ മാറ്റാനാരംഭിച്ചു

കരിപ്പൂർ : കോഴിക്കോട് വിമാനത്താവളത്തിൽ അപകടത്തിൽപ്പെട്ട എയർഇന്ത്യ എക്സ്പ്രസ് വിമാനത്തിന്റെ ഭാഗങ്ങൾ കൂട്ടാലുങ്ങൽ ഭാഗത്ത് പ്രത്യേകമായി ഒരുക്കിയ സ്ഥലത്തേക്ക് മാറ്റി. അപകടത്തിൽ മൂന്നായി തകർന്ന വിമാനത്തിന്റെ കോക്ക്പിറ്റ് ഉൾപ്പെടുന്ന ഭാഗവും മധ്യഭാഗവും കഷണങ്ങളാക്കിയാണ് മാറ്റിയത്.

മുംബൈയിൽനിന്നുള്ള എയർഇന്ത്യ ഉദ്യോഗസ്ഥരുടെ സാന്നിധ്യത്തിലായിരുന്നു വിമാനഭാഗം ഉയർത്തിയത്. കഴിഞ്ഞദിവസം കോക്ക്പിറ്റിന്റെ അടിഭാഗം വിമാനാപകടം അന്വേഷിക്കുന്ന വിദഗ്‌ധസംഘം പരിശോധിച്ച് ലോറിയിൽ കയറ്റിയിരുന്നു. എന്നാൽ പരിശോധന പൂർത്തിയാകാത്തതിനാൽ സംഘം മാറ്റാൻ അനുമതി നൽകിയിരുന്നില്ല. വെള്ളിയാഴ്ച അനുമതി ലഭിച്ചതോടെയാണ് മാറ്റിയത്.