ദേവികയുടെ കുടുംബത്തിന് സർക്കാർ ജോലി; സാധ്യതകൾ ആരായുന്നു

ഇരിമ്പിളിയം: ഓൺലൈൻ പഠനം മുടങ്ങുമെന്ന വിഷമത്തിൽ മനംനൊന്ത് ആത്മഹത്യചെയ്ത ഇരിമ്പിളിയം തിരുനിലത്തെ പുളിയപ്പറ്റ കോളനിയിലെ ബാലകൃഷ്ണന്റെ മകളും ഇരിമ്പിളിയം ഗവ. ഹയർസെക്കൻഡറി സ്‌കൂളിലെ ഒമ്പതാം ക്ലാസ് വിദ്യാർഥിനിയുമായ ദേവികയുടെ കുടുംബത്തിന് സർക്കാർജോലി നൽകുന്നതിനുള്ള സാധ്യതകൾ ആരായുന്നു. ഇക്കാര്യത്തിൽ ആവശ്യമായ നടപടികൾ പരിശോധിക്കാൻ ജില്ലാ പട്ടികജാതി വികസന ഓഫീസർക്ക് സർക്കാർ നിർദേശംനൽകി.

കെ.പി.സി.സി. അംഗം അഡ്വ. കെ. ശിവരാമൻ ഇതു സംബന്ധിച്ച് ജില്ലാ കളക്ടർക്ക് അപേക്ഷ നൽകിയിരുന്നു. ഓൺലൈൻ പഠനം സാധ്യമാകാത്തതിന്റെ മാനസികപ്രയാസത്തിൽ ഈ അധ്യയനവർഷം സ്‌കൂൾ തുറന്നദിവസം ദേവിക തീകൊളുത്തി മരിക്കുകയായിരുന്നു.