തവനൂർ പഞ്ചായത്തിൽ അവിശ്വാസം ഇന്ന്; കോൺഗ്രസ് പ്രസിഡന്റിനെതിരെ ലീഗിലെ ഒരു വിഭാഗം

തവനൂർ: എൽഡിഎഫ് ഭരിക്കുന്ന തവനൂർ പഞ്ചായത്തിൽ പ്രസിഡന്റിനെതിരെ ഭരണപക്ഷ അംഗങ്ങൾ കൊണ്ടുവന്ന അവിശ്വാസ പ്രമേയം ഇന്ന്. എൽഡിഎഫിലെ ഒൻപത് അംഗങ്ങൾ ഒപ്പിട്ടു നൽകിയ അവിശ്വാസ പ്രമേയമാണ് ഇന്ന് ചർച്ചയ്ക്കെടുക്കുക. സ്വന്തന്ത്രനായ കെ.പി.സുബ്രഹ്മണ്യനെ പ്രസിഡന്റ് സ്ഥാനത്തുനിന്നു പുറത്താക്കുകയാണ് അവിശ്വാസത്തിലൂടെ എൽഡിഎഫ് ലക്ഷ്യമിടുന്നത്.

എൽഡിഎഫ് അംഗങ്ങൾ അവിശ്വാസത്തിനു നോട്ടിസ് നൽകിയതിനെതുടർന്ന് കഴിഞ്ഞ ദിവസം കെ.പി.സുബ്രഹ്മണ്യൻ കോൺഗ്രസിൽ ചേർന്നിരുന്നു. ഇതോടെ യുഡിഎഫിന് 10 അംഗങ്ങൾ ലഭിച്ചെങ്കിലും ഇന്നു നടക്കുന്ന അവിശ്വാസം സുബ്രഹ്മണ്യൻ മറികടക്കുമോ എന്ന കാര്യത്തിൽ വ്യക്തതയില്ല. നേരത്തെ യുഡിഎഫിൽനിന്നു മാറി എൽഡിഎഫിന്റെ പിന്തുണയോടെ പ്രസിഡന്റാവുകയും യുഡിഎഫിന് ഭരണം നഷ്ടമാകുകയും ചെയ്തിരുന്നു. സുബ്രഹ്മണ്യനെ മുസ്‌ലിം ലീഗിലെ ഒരു വിഭാഗം എതിർക്കുന്നുണ്ട്. ഇന്നു നടക്കുന്ന അവിശ്വാസ പ്രമേയം കെ.പി.സുബ്രഹ്മണ്യൻ മറികടക്കുമോ എന്ന കാര്യത്തിൽ വ്യക്തതയില്ല.

പ്രസിഡന്റ് സ്ഥാനം ലീഗിന് വേണമെന്ന്

തവനൂർ പഞ്ചായത്ത്‌ പ്രസിഡന്റ്‌ സ്ഥാനം വേണമെന്ന ആവശ്യവുമായി മുസ്‌ലിം ലീഗിലെ ഒരു വിഭാഗം രംഗത്ത്. ഇന്നലെ മാണൂരിൽ ചേർന്ന യോഗത്തിലാണ് കോൺഗ്രസിന് പ്രസിഡന്റ്‌ സ്ഥാനം നൽകുന്നതിനെ ചിലർ എതിർത്തത്. ഇതുമായി ബന്ധപ്പെട്ട് യോഗത്തിൽനിന്നു ചിലർ ഇറങ്ങിപ്പോയതായും സൂചനയുണ്ട്. ആറു സീറ്റുകൾ ഉള്ള ലീഗിന് പ്രസിഡന്റ്‌ സ്ഥാനവും കോൺഗ്രസിന് വൈസ് പ്രസിഡന്റ്‌ സ്ഥാനവും നൽകണമെന്നാണ് ഈ വിഭാഗം ആവശ്യപ്പെട്ടത്.

Content highlights: no confidence motion against tavanur panchayath president