സംസ്ഥാനത്തെ വിദ്യാർഥികൾക്ക് ജൂൺ ഒന്ന് മുതൽ പഠനം ഓൺലൈനിൽ; ടൈംടേബിൾ അറിയാം

തിരുവനന്തപുരം: സംസ്ഥാനത്തെ വിദ്യാർഥികൾക്ക് നാളെ മുതല്‍ ഓണ്‍ലൈന്‍ ക്ലാസുകള്‍ ആരംഭിക്കും. വിക്ടേഴ്സ് ചാനല്‍ വഴിയാണ് ക്ലാസുകൾ സംപ്രേക്ഷണം ചെയ്യുകയെന്നും ഒരു സമയം ഒരു ക്ലാസ് മാത്രമായിരിക്കും നടക്കുകയെന്നും വിദ്യാഭ്യാസ മന്ത്രി സി.രവീന്ദ്രനാഥ് അറിയിച്ചു. ഓരോ വിഷയത്തിനും അരമണിക്കൂർ ദൈർഘ്യമുള്ള ക്ലാസുകളാണ് സംപ്രേഷണം ചെയ്യുന്നത്.

ടൈംടേബിൾ: ജൂൺ ഒന്ന്

പ്ലസ് ടു
രാവിലെ 08.30 ന് ഇംഗ്ലീഷ്
രാവിലെ 09.00 ന് ജിയോഗ്രഫി
രാവിലെ 09.30 ന് മാത്തമാറ്റിക്സ്
രാവിലെ 10.00 ന് കെമിസ്ട്രി
(രാത്രി 7.00 മുതൽ മേല്പറഞ്ഞ ക്രമത്തിൽ പുനസംപ്രേക്ഷണം ഉണ്ടായിരിക്കും)
ഒന്നാം ക്ലാസ്
രാവിലെ 10.30ന് പൊതുവിഷയം
പത്താം ക്ലാസ്
രാവിലെ 11.00 ന് ഭൗതികശാസ്ത്രം
രാവിലെ 11.30 ന് ഗണിതശാസ്ത്രം
ഉച്ചക്ക് 12.00 ന് ജീവശാസ്ത്രം
രണ്ടാം ക്ലാസ്
ഉച്ചക്ക് 12.30 ന് പൊതുവിഷയം
മൂന്നാം ക്ലാസ്
ഉച്ചക്ക് 1.00 ന് മലയാളം
നാലാം ക്ലാസ്
ഉച്ചക്ക് 01.30 ന് ഇംഗ്ലീഷ്
അഞ്ചാം ക്ലാസ്
ഉച്ചക്ക് 2.00 ന് മലയാളം
ആറാം ക്ലാസ്
ഉച്ചക്ക് 02.30ന് മലയാളം
ഏഴാം ക്ലാസ്
ഉച്ചക്ക് 03.00ന് മലയാളം
എട്ടാം ക്ലാസ്
വൈകിട്ട് 3.30 ന് ഗണിതശാസ്ത്രം
വൈകീട്ട് 4.00 ന് രസതന്ത്രം
ഒമ്പതാം ക്ലാസ്
വൈകീട്ട് 4.30 ന് ഇംഗ്ലീഷ്
വൈകീട്ട് 5.00 ന് ഗണിതശാസ്ത്രം
പന്ത്രണ്ടാം ക്ലാസ് ഒഴികെ മറ്റു ക്ലാസുകളിലെ വിഷയങ്ങളുടെ പുനഃസംപ്രേഷണം ശനിയാഴ്ചയായിരിക്കും.

ക്ലാസുകൾ എവിടെ, എങ്ങനെ കാണാം?

കൈറ്റ് വിക്ടേഴ്സ് ചാനൽ കേബിൾ ശൃംഖലകളിൽ ലഭ്യമാണ്. ഏഷ്യാനെറ്റ് ഡിജിറ്റലിൽ 411, ഡെൻ നെറ്റ്വർക്കിൽ 639, കേരള വിഷനിൽ 42, ഡിജി മീഡിയയിൽ 149, സിറ്റി ചാനലിൽ 116 എന്നീ നമ്പറുകളിലാണ് ചാനൽ ലഭിക്കുക. വീഡിയോകോൺ ഡി2എച്ചിലും ഡിഷ് ടി.വി.യിലും 642-ാം നമ്പറിൽ ചാനൽ ദൃശ്യമാകും. മറ്റു ഡി.ടി.എച്ച്. ഓപ്പറേറ്റർമാരും എത്രയും പെട്ടെന്ന് അവരുടെ ശൃംഖലയിൽ കൈറ്റ് വിക്ടേഴ്സ് ഉൾപ്പെടുത്തും എന്ന് പ്രതീക്ഷിക്കുന്നു. ഇതിനു പുറമേ www.victers.kite.kerala.gov.in പോർട്ടൽ വഴിയും ഫെയ്സ്ബുക്കിൽ തൽസമയവും യുട്യൂബ് ചാനലിൽ സംപ്രേക്ഷണത്തിന് ശേഷവും ക്ലാസുകൾ ലഭ്യമാകും. ആദ്യ ആഴ്ചയിൽ ട്രയൽ സംപ്രേഷണമായതിനാൽ ജൂൺ ഒന്നിലെ ക്ലാസുകൾ അതേക്രമത്തിൽ ജൂൺ എട്ടിന് തിങ്കളാഴ്ച പുനഃസംപ്രേഷണം ചെയ്യും. വീട്ടിൽ ടി.വിയോ സ്മാർട്ട് ഫോണോ, ഇന്റർനെറ്റോ ഒന്നുമില്ലാത്ത ഒരു കുട്ടിക്ക്പോലും ക്ലാസുകൾ കാണാൻ അവസരം ഇല്ലാതിരിക്കുന്ന സാഹചര്യം പൂർണമായും ഒഴിവാക്കേണ്ടതാണെന്ന് സർക്കാർ ഉത്തരവിൽ നിഷ്‌കർഷിച്ചിട്ടുണ്ട്. ഇതനുസരിച്ചുള്ള ക്രമീകരണങ്ങൾ ക്ലാസദ്ധ്യാപകർ കുട്ടികളുമായി ബന്ധപ്പെട്ടും പ്രഥമാധ്യാപകർ തദ്ദേശ ഭരണ സ്ഥാപനങ്ങളുടേയും കുടുംബശ്രീ യൂണിറ്റുകളുടേയും പി.ടി.എകളുടേയുമെല്ലാം സഹായത്തോടെ ഏർപ്പെടുത്താനും സർക്കാർ നിർദ്ദേശിച്ചിട്ടുണ്ട്. ആദ്യ ആഴ്ച തന്നെ ആവശ്യകതയ്ക്കനുസരിച്ച് കൈറ്റ് സ്‌കൂളുകളിൽ ഹൈടെക് പദ്ധതിയുടെ ഭാഗമായി ലഭ്യമാക്കിയ 1.2 ലക്ഷം ലാപ്ടോപ്പുകൾ, 7000 പ്രോജക്ടറുകൾ, 4545 ടെലിവിഷനുകൾ തുടങ്ങിയവ സൗകര്യങ്ങൾ ലഭ്യമല്ലാത്ത പ്രദേശത്ത് കൊണ്ടുപോയി ഉപയോഗിക്കാൻ അനുവാദം നൽകുമെന്ന് കൈറ്റ് സി.ഇ.ഒ കെ. അൻവർ സാദത്ത് അറിയിച്ചു. സംപ്രേഷണ സമയത്തോ ആദ്യ ദിവസങ്ങളിലോ ക്ലാസുകൾ കാണാൻ കഴിയാത്ത കുട്ടികൾ ഉണ്ടെങ്കിൽ രക്ഷിതാക്കളും കുട്ടികളും യാതൊരു കാരണവശാലും ആശങ്കപ്പെടേണ്ട കാര്യമില്ല. അവർക്കായി പിന്നീട് ഡൗൺലോഡ് ചെയ്ത ഉള്ളടക്കം ഓഫ്ലൈനായി കാണിക്കുന്നതുൾപ്പെടെ വിവിധങ്ങളായ സംവിധാനങ്ങളും തുടർന്ന് ഏർപ്പെടുത്തുന്നതാണ്.