കോട്ടയ്ക്കൽ മണ്ഡലത്തിലെ ഗവ. ആശുപത്രികൾക്ക് എം.എൽ.എ. ഫണ്ടുപയോഗിച്ച് മെഡിക്കൽ ഉപകരണങ്ങൾ നൽകി

വളാഞ്ചേരി : കോട്ടയ്ക്കൽ മണ്ഡലത്തിലെ ഏഴ് സർക്കാർ ആശുപത്രികൾക്ക് 14 ലക്ഷം രൂപയുടെ ഉപകരണങ്ങൾ വിതരണം ചെയ്തു. കോവിഡ് പ്രതിരോധപ്രവർത്തനങ്ങൾക്കും ഉപകരണങ്ങൾ വാങ്ങുന്നതിനുമായി ആബിദ് ഹുസൈൻ തങ്ങൾ എം.എൽ.എ.യുടെ ആസ്തി വികസന പദ്ധതിയിൽ ഉൾപ്പെടുത്തി അനുവദിച്ച അമ്പത് ലക്ഷത്തിൽനിന്ന് രണ്ടു ഘട്ടമായി പതിനാല് ലക്ഷം രൂപയുടെ ഉപകരണങ്ങളാണ് വിതരണം ചെയ്തത്. ആബിദ് ഹുസൈൻ തങ്ങൾ എം.എൽ.എ. പൊന്മള ഗ്രാമപ്പഞ്ചായത്ത് പ്രസിഡന്റ് ജസീന മജീദിന് ഉപകരണങ്ങൾ നൽകി വിതരണോദ്ഘാടനം നിർവഹിച്ചു. ബ്ലോക്ക് പ്രസിഡന്റ് വസീമ വേളേരി, കുറ്റിപ്പുറം താലൂക്ക് മെഡിക്കൽ ഓഫീസർ ഡോ. ടി.കെ. അലിയാമു, പൊന്മള ഗ്രാമപ്പഞ്ചായത്ത് ആരോഗ്യ സ്ഥിരംസമിതി അധ്യക്ഷ സുഹറാബി എന്നിവർ പ്രസംഗിച്ചു.