കേരള സ്റ്റേറ്റ് സർവീസ് പെൻഷനേഴ്സ് അസോസിയേഷൻ മലപ്പുറം ജില്ലാ സമ്മേളനം ഡിസംബർ 12, 13 തിയ്യതികളിൽ കുറ്റിപ്പുറത്ത്

കുറ്റിപ്പുറം : സ്റ്റേറ്റ് സർവീസ് പെൻഷനേഴ്സ് അസോസിയേഷൻ ജില്ലാസമ്മേളനം 12, 13 തീയതികളിൽ കുറ്റിപ്പുറം വി.എം. കൊളക്കാട് നഗറിൽ (വ്യാപാര ഭവൻ) നടക്കുമെന്ന് സ്വാഗതസംഘം ഭാരവാഹികൾ പത്രസമ്മേളനത്തിൽ അറിയിച്ചു. പെൻഷൻ പരിഷ്കരിക്കുക, ക്ഷാമാശ്വാസ കുടിശ്ശികകൾ അനുവദിക്കുക, മെഡിസെപ്പിലെ അപാകങ്ങൾ പൂർണമായും പരിഹരിക്കുക എന്നീ ആവശ്യങ്ങൾ ഉന്നയിച്ച് സംഘടന പ്രക്ഷോഭരംഗത്താണെന്നും പെൻഷൻകാരോട് ഇടതു സർക്കാർ കാണിക്കുന്ന നിഷേധനിലപാട് അവസാനിപ്പിക്കണമെന്നും നേതാക്കൾ ആവശ്യപ്പെട്ടു.
നിലവിലെ ജില്ലാ കൗൺസിലിന്റെ യോഗം 12-ന് രാവിലെ 10-നും പുതിയ കൗൺസിലിന്റേത് ഉച്ചയ്ക്ക് രണ്ടിനും നടക്കും. 13-ന് രാവിലെ 10-ന് ആര്യാടൻ മുഹമ്മദ് നഗറിൽ (ഫുജൈറ ഓഡിറ്റോറിയം) നടക്കുന്ന പൊതുസമ്മേളനം കെ.പി.സി.സി. വൈസ് പ്രസിഡന്റ് വി.ടി. ബൽറാം ഉദ്ഘാടനംചെയ്യും. ഡി.സി.സി. പ്രസിഡന്റ് വി.എസ്. ജോയി അധ്യക്ഷനാകും. 11.15-ന് പ്രതിനിധിസ്വമ്മേളനം കെ.പി.സി.സി. ജനറൽസെക്രട്ടറി ആര്യാടൻ ഷൗക്കത്ത് ഉദ്ഘാടനംചെയ്യും. ജില്ലാപ്രസിഡന്റ് മുല്ലശ്ശേരി ശിവരാമൻ നായർ അധ്യക്ഷനാകും.

വനിതാസമ്മേളനം വനിതാഫോറം സംസ്ഥാന പ്രസിഡന്റ് എ. നസീം ബീവി ഉദ്ഘാടനംചെയ്യും. ഉച്ചയ്ക്കു ശേഷം നടക്കുന്ന സംഘടനാചർച്ചയിൽ വിഷയാവതരണം സംസ്ഥാന വൈസ് പ്രസി. പി.എം. അബ്ദുറഹ്‌മാൻ നടത്തും. സ്വാഗതസംഘം ചെയർമാൻ സി.കെ. ഉമ്മർ ഗുരുക്കൾ, മുല്ലശ്ശേരി ശിവരാമൻ നായർ, കെ.എ. സുന്ദരൻ, എം. അബ്ദുൾഖാദർ, ബാലകൃഷ്‌ണൻ എന്നിവർ പത്രസമ്മേളനത്തിൽ പങ്കെടുത്തു.