കോട്ടക്കലിൽ പതിനേഴുകാരിയെ പീഡിപ്പിച്ച കേസിൽ പ്രതി കീഴടങ്ങി

കോട്ടയ്ക്കൽ : പതിനേഴുകാരിയെ പീഡിപ്പിച്ചെന്ന പരാതിയിൽ ഒളിവിലായിരുന്ന പ്രതി കോടതിയിൽ കീഴടങ്ങി. എടരിക്കോട് അമ്പലവട്ടം കൊയപ്പകോവിലകത്ത് താജുദ്ദീൻ (32) ആണ് കോടതിയിൽ ഹാജരായത്. പ്രതിയെ കസ്റ്റഡിയിൽവാങ്ങിയ കോട്ടയ്ക്കൽ പോലീസ് ചോദ്യംചെയ്യലിനും തെളിവെടുപ്പിനുശേഷം വീണ്ടും കോടതിയിൽ ഹാജരാക്കി റിമാൻഡ്ചെയ്തു.

സെപ്റ്റംബർ 23-നായിരുന്നു കേസിനാസ്‌പദമായ സംഭവം. വീട്ടിൽനിന്ന് ഇറക്കിക്കൊണ്ടുപോയി വാഹനത്തിലും മറ്റുമായി പീഡിപ്പിച്ചെന്നാണ് പരാതി. ഒക്ടോബർ 15-ന് പെൺകുട്ടിയുടെ പരാതിയിൽ കേസെടുത്തു. ഇതോടെ താജുദ്ദീൻ ഒളിവിൽപ്പോയി. പോലീസ് അന്വേഷണം ശക്തമാക്കിയതോടെ പ്രതി കോടതിയിൽ കീഴടങ്ങുകയായിരുന്നു. പരാതിക്കാരിയെ വീട്ടിൽക്കയറി ഭീഷണിപ്പെടുത്തിയതടക്കം വിവിധ സ്റ്റേഷനുകളിലായി പത്ത് കേസുകൾ ഇയാളുടെ പേരിലുണ്ടെന്ന് പോലീസ് പറഞ്ഞു. ഇൻസ്‌പെക്ടർ പ്രദീപ്‌കുമാർ, സി.പി.ഒമാരായ കൈലാസ്, സുജിത്ത്, രതീഷ് എന്നിവരാണ് അന്വേഷണ സംഘത്തിലുണ്ടായിരുന്നത്.