പൊടിയിൽ മുങ്ങി കുറ്റിപ്പുറം ഹൈവേ ജംഗ്ഷൻ

കുറ്റിപ്പുറം : ഹൈവേ ജങ്ഷനിൽ ആറുവരിപ്പാത നിർമാണ കമ്പനി നടത്തിയ മണ്ണിടൽ വാഹനയാത്രക്കാർക്കും കാൽനടക്കാർക്കും ബുദ്ധിമുട്ടുണ്ടാക്കുന്നു. നിലവിലുണ്ടായിരുന്ന റൗണ്ട് എബൗട്ട് പൊളിച്ചുനീക്കിയിടത്താണ് കരാർ കമ്പനി ശനിയാഴ്‌ച മണ്ണിട്ടത്. വാഹനങ്ങൾ പോയിത്തുടങ്ങിയതോടെ പരിസരത്ത് പൊടിശല്യം രൂക്ഷമായി. ഇരുചക്രവാഹനങ്ങൾ പലതും നിയന്ത്രണംതെറ്റി അപകടത്തിൽപ്പെടുകയുംചെയ്തു. റൗണ്ട് എബൗട്ട് പൊളിച്ചുനീക്കിയിടത്ത് കരിങ്കൽചീളുകളും ഇരുമ്പുകമ്പികളും പിന്നെയും അവശേഷിച്ചിരുന്നു.

ഇത്‌ വാഹനങ്ങളുടെ സുഗമമായ യാത്രയ്ക്ക് തടസ്സമുണ്ടാക്കി. ഇരുചക്രവാഹനയാത്രക്കാർ അപകടത്തിൽപ്പെടുന്നതിനും ഇതു വഴിയൊരുക്കി. ഇതേത്തുടർന്നാണ് ശനിയാഴ്‌ച കരാർ കമ്പനി ഇവിടെ മണ്ണിട്ടത്. റൗണ്ട് എബൗട്ട് പൊളിച്ചുനീക്കിയ ഭാഗം കോൺക്രീറ്റോ ടാറോ ഉപയോഗിച്ച് പുനർനിർമിക്കേണ്ടതിനു പകരമാണ് കമ്പനി മണ്ണുകൊണ്ടുള്ള ഈ കൺകെട്ടുവിദ്യ ചെയ്തിരിക്കുന്നത്.