കുറ്റിപ്പുറം ടൗണിലെ കംഫർട്ട് സ്റ്റേഷനിൽ പഞ്ചായത്ത് പ്രസിഡന്റിന്റെ നേതൃത്വത്തിൽ മിന്നൽപ്പരിശോധന

കുറ്റിപ്പുറം : ടൗൺ ബസ്‌സ്റ്റാൻഡിനു സമീപത്തെ പഞ്ചായത്തിന്റെ അധീനതയിലുള്ള കംഫർട്ട് സ്റ്റേഷനിൽ പഞ്ചായത്ത് പ്രസിഡന്റിന്റെ നേതൃത്വത്തിൽ മിന്നൽപ്പരിശോധന. ചൊവ്വാഴ്ച രാവിലെ പ്രസിഡന്റ് നസീറ പറത്തൊടി, പഞ്ചായത്ത് അസി. സെക്രട്ടറി ജാബിർകുട്ടി എന്നിവരാണ് പരിശോധന നടത്തിയത്. കംഫർട്ട് സ്റ്റേഷൻ സമൂഹദ്രോഹികളുടെ കൂടിച്ചേരൽ കേന്ദ്രമായതും ഇവിടം കേന്ദ്രീകരിച്ചു നടക്കുന്ന അക്രമസംഭവങ്ങളും സംബന്ധിച്ച് തിങ്കളാഴ്ച മാതൃഭൂമി പ്രസിദ്ധീകരിച്ച വാർത്തയെത്തുടർന്നാണ് പരിശോധന നടന്നത്. കംഫർട്ട് സ്റ്റേഷന്റെ ശുചിത്വമില്ലായ്മക്കെതിരേയും ഇവിടെ സാമൂഹിക ദ്രോഹികൾ കേന്ദ്രീകരിക്കുന്നതിനെതിരേയും കരാറുകാരന് ശക്തമായ താക്കീതു നൽകി. കരാറുകാരനിൽ നിന്നു രേഖാമൂലമുള്ള വിശദീകരണവും പ്രസിഡന്റ് ആവശ്യപ്പെട്ടിട്ടുണ്ട്.