അഭിമാന ബോധമുണ്ടെങ്കിൽ മുഖ്യമന്ത്രിയും ധനകാര്യ മന്ത്രിയും രാജിവെച്ച് ജനങ്ങളോട് മാപ്പ് പറയണം: ആബിദ് ഹുസൈൻ തങ്ങൾ എം.എൽ.എ

കൊളത്തൂർ: അഭിമാന ബോധമുണ്ടെങ്കിൽ മുഖ്യമന്ത്രിയും ധനകാര്യ മന്ത്രിയും രാജിവെച്ച് ജനങ്ങളോട് മാപ്പ് പറയണമെന്ന് പ്രൊഫ. കെ.കെ ആബിദ് ഹുസൈൻ തങ്ങൾ എംഎൽഎ പറഞ്ഞു. വിജിലൻസ് റെയ്ഡ് നടത്തി അഴിമതി പുറത്തു കൊണ്ടു വന്ന റിപ്പോർട്ട് മുഖ്യമന്ത്രിയുടെ വകുപ്പിനു കീഴിലെ വിജിലൻസ് മരവിപ്പിച്ചിരിക്കുകയാണ്. അതേസമയം ധനകാര്യ മന്ത്രിക്ക് വീഴ്ച പറ്റിയിട്ടുണ്ട് എന്നതിന് തെളിവാണ് അദ്ദേഹത്തെ പാർട്ടി ശാസിച്ചുവെന്നത്. കുറ്റം ചെയ്തുവെന്ന് മനസ്സിലായിട്ടും സംരക്ഷിക്കുന്ന മുഖ്യമന്ത്രിയുടെ നടപടി ദുരൂഹമാണെന്നും ഇതിനുള്ള ശക്തമായ തിരിച്ചടിയായിരിക്കും തദ്ദേശസ്ഥാപനങ്ങളിലെ വോട്ടർമാർ സിപിഎമ്മിന് നൽകുകയെന്നും അദ്ദേഹം പറഞ്ഞു.

ജില്ലാപഞ്ചായത്ത് എടയൂർ ഡിവിഷനിലെ യു.ഡി.എഫ് സ്ഥാനാർത്ഥി എ.പി സബാഹിന്റെ രണ്ടാം ദിവസത്തെ പര്യടനം വടക്കുംപുറം ബ്ലോക്ക് ഡിവിഷനിലെ പുത്തൻ വീട് കോളനിയിൽ ഉദ്ഘാടനം ചെയ്യുകയായിരുന്നു അദ്ദേഹം. മുസ്ലിംലീഗ് ജില്ലാ സെക്രട്ടറി സലീം കുരുവമ്പലം, ശരീഫ് മാസ്റ്റർ, മൊയ്തു എടയൂർ, അസീസ് എടയൂർ, അബ്ദുൽ റഷീദ് കെ, മോഹന കൃഷ്ണൻ പ്രസംഗിച്ചു.