ഇതരസംസ്ഥാന തൊഴിലാളിയെ ഭീഷണിപ്പെടുത്തി കവർച്ച

കൊളത്തൂർ: ഇതരസംസ്ഥാന തൊഴിലാളിയെ കഴുത്തിനുപിടിച്ച് കത്തികാട്ടി ഭീഷണിപ്പെടുത്തി പണവും മൊബൈൽഫോണും തട്ടിയെടുത്തതായി പരാതി. വെള്ളിയാഴ്ച രാത്രി 2.30-നാണ് സംഭവം നടന്നതായി പറയുന്നത്. കടുങ്ങപുരത്തെ ബേക്കറിയിൽ ജോലിചെയ്യുന്ന അസംസ്വദേശി ജാക്കിറി (29)നെയാണ് ഭയപ്പെടുത്തി മോഷണംനടത്തിയത്. ജോലികഴിഞ്ഞ് രാത്രി മുറിയിൽ കിടന്നുറങ്ങുമ്പോൾ മുഖംമൂടിയണിഞ്ഞ രണ്ടുപേർ വാതിൽ ചവിട്ടിത്തുറന്ന് കഴുത്തിനുപിടിച്ച് കത്തികാട്ടി ഭീഷണിപ്പെടുത്തിയതായാണ് പറയുന്നത്.

കൈയിലുണ്ടായിരുന്ന 18,000 രൂപയും 6,500 രൂപ വിലയുള്ള മൊബൈൽഫോണും മോഷ്ടാക്കൾ പിടിച്ചുവാങ്ങിയതായി പറയുന്നു. സംഭവവുമായി ബന്ധപ്പെട്ട് ജാക്കിറിന്റെ തൊഴിലുടമ പട്ടിക്കാട് കൊടുവായ്ക്കൽ ജലീൽ കൊളത്തൂർ പോലീസിൽ പരാതി നൽകിയിരിക്കയാണ്. സംഭവത്തെക്കുറിച്ച് അന്വേഷണം നടത്തിവരുന്നതായി പോലീസ് പറഞ്ഞു.