കോട്ടക്കൽ പാലത്തറയിൽ അനധികൃതമായി നിർത്തിയിട്ടിരുന്ന ബസ് നീക്കംചെയ്തു

കോട്ടയ്ക്കൽ : നഗരസഭയുടെ പാലത്തറയിലെ ഭൂമിയിൽ അനധികൃതമായി നിർത്തിയിട്ടിരുന്ന സ്വകാര്യ ബസ് നീക്കംചെയ്തു. ബസ് ലഹരി സംഘങ്ങളുടെ താവളമായി മാറുന്നുവെന്നും സമീപത്തുള്ള അങ്കണവാടിയിലെ കുട്ടികൾക്ക് ഭീഷണിയാണെന്നും ബസ് നീക്കം ചെയ്യണമെന്നും ആവശ്യപ്പെട്ട് നഗരസഭയ്ക്കും പോലീസിനും ജില്ലാ കളക്ടർക്കും ഡി.വൈ.എഫ്.ഐ. പാലത്തറ യൂണിറ്റ് കമ്മിറ്റി പരാതി നൽകിയിരുന്നു.

എന്നാൽ നടപടിയുണ്ടാകാത്തതിനെത്തുടർന്ന് ശിശുക്ഷേമസമിതി ചെയർമാൻ ഷിജു ഖാന് പരാതി നൽകുകയായിരുന്നു. സമിതി റിപ്പോർട്ട് ആവശ്യപ്പെടുകയും വാഹനം മാറ്റുന്നതിന് നിർദ്ദേശം നൽകുകയുംചെയ്തു. ഇതോടെയാണ് നഗരസഭാ അധികൃതർ ബസ് നീക്കംചെയ്തത്.