വളാഞ്ചേരിയിൽ ശിഹാബ് തങ്ങൾ ഡയാലിസിസ് സെന്റർ ഉദ്ഘാടനം ഇന്ന്

വളാഞ്ചേരി ∙ ശിഹാബ് തങ്ങൾ ചാരിറ്റബിൾ ട്രസ്റ്റ് ശാന്തി മെഡിക്കൽ ഇൻഫർമേഷൻ സെന്ററിന്റെ സഹകരണത്തോടെ നടത്തുന്ന ശിഹാബ് തങ്ങൾ ഡയാലിസിസ് സെന്റർ ഇന്ന് രാവിലെ 10നു പാണക്കാട് ഹൈദരലി ശിഹാബ് തങ്ങൾ നാടിനു സമർപ്പിക്കും. ഇ.ടി.മുഹമ്മദ്ബഷീർ എംപി, എംഎൽഎമാരായ വി.ടി.ബൽറാം, കെ.കെ.ആബിദ്ഹുസൈൻ തങ്ങൾ, മുഹമ്മദ് മുഹ്‍സിൻ എന്നിവർ പങ്കെടുക്കും. ആധുനിക സംവിധാനങ്ങളോടെ വളാഞ്ചേരി നിസാർ ആശുപത്രിയിലാണ് സെന്ററിന്റെ പ്രവർത്തനം.

നിർധനരായ രോഗികൾക്ക് സെന്ററിൽ ഡയാലിസിസ് സൗജന്യമാണ്. ചെലവ് ശിഹാബ് തങ്ങൾ ചാരിറ്റബിൾ ട്രസ്റ്റ് വഹിക്കും. അഞ്ചു ഡയാലിസിസ് യന്ത്രങ്ങൾ ദിവസവും രണ്ടു ഷിഫ്റ്റുകളായി പ്രവർത്തിക്കും. മാസത്തിൽ 260 ഡയാലിസിസ് നടത്തുന്നതിനുള്ള സൗകര്യമുണ്ട്. സെന്ററിന്റെ നേതൃത്വത്തിൽ സന്നദ്ധ സംഘടനകളുടെ സഹകരണത്തോടെ മേഖലയിലെ ഏഴു കേന്ദ്രങ്ങളിൽ നടത്തിയ വൃക്കരോഗ നിർണയ ക്യാംപുകളിൽ കണ്ടെത്തിയവർക്കാണ് ആദ്യഘട്ടത്തിൽ ഡയാലിസിസ്. നാളെ ഇവർക്കുള്ള സ്ക്രീനിങ് നടത്തും.

ബുധൻ മുതൽ സെന്ററിന്റെ പ്രവർത്തനം പൂർണമായും തുടങ്ങുമെന്ന് കെ.കെ.ആബിദ്ഹുസൈൻ തങ്ങൾ എംഎൽഎ, സി.എച്ച്.അബൂയൂസഫ് ഗുരുക്കൾ, ഡോ. എൻ.എം.മുജീബ് റഹ്മാൻ, ട്രസ്റ്റ് ചെയർമാൻ അഷറഫ് അമ്പലത്തിങ്ങൽ, ചീഫ് കോഓർഡിനേറ്റർ സലാം വളാഞ്ചേരി എന്നിവർ അറിയിച്ചു.