കുട്ടികളത്താണി അങ്ങാടിയിൽ റോഡ് പൊട്ടിപ്പൊളിഞ്ഞത് യാത്രക്കാർക്കു ഭീഷണിയാകുന്നു

തിരുനാവായ: പുത്തനത്താണി – തിരുനാവായ റോഡിലെ കുട്ടികളത്താണി അങ്ങാടിയിലെ റോഡിലെ കുഴികൾ യാത്രക്കാർക്കു ഭീഷണിയാകുന്നു. തിരൂർ – തിരുനാവായ- പുത്തനത്താണി എന്നീ ഭാഗങ്ങളിലേക്കു പോകുന്ന യാത്രക്കാർ സംഗമിക്കുന്ന ഇവിടെ മഴപെയ്താൽ വെള്ളക്കെട്ടുമൂലം കുഴികൾ കാണാത്ത രീതിയാണ്. ഒലിച്ചുവരുന്ന മണ്ണ് വിവിധ ഭാഗങ്ങളിൽ ഉയർന്നു നിൽക്കുന്നതും അപകടമാണ്. ദേശീയപാത പുത്തനത്താണിയിൽ അപകടം സംഭവിച്ചാൽ കോഴിക്കോട് – തൃശ്ശൂർ ഭാഗങ്ങളിലേക്കു പോകുന്ന യാത്രക്കാർ ആശ്രയിക്കുന്ന ഏക റോഡാണിത്. ബൈക്ക് യാത്രക്കാർ ഇവിടെ കൂടുതലായി അപകടത്തിൽപ്പെടുന്നു. കുഴി അടച്ച് വെള്ളക്കെട്ടിനു പരിഹാരം കാണണമെന്ന് യാത്രക്കാരും വ്യാപാരികളും ആവശ്യപ്പെടുന്നു.