മേൽപ്പാലം പണി; എടപ്പാളിൽ ഇന്ന് ഗതാഗത നിയന്ത്രണം

എടപ്പാൾ : മേൽപ്പാലംപണിയുടെ ഭാഗമായി പൊന്നാനി -പാലക്കാട് റോഡിൽ ബുധനാഴ്ച രാവിലെമുതൽ രാത്രി പത്തുവരെ ഗതാഗത നിയന്ത്രണമേർപ്പെടുത്തി. പാലത്തിന്റെ തൃശ്ശൂർ -കോഴിക്കോട് റോഡുകളെ ബന്ധിപ്പിക്കുന്ന ഭാഗത്തെ ബീമിന്റെ കോൺക്രീറ്റ് ജോലികൾ നടക്കുന്നതിനാലാണ് നിയന്ത്രണം.

പൊന്നാനിയിൽനിന്ന് പട്ടാമ്പിയിലേക്കുള്ള വാഹനങ്ങൾ അംശക്കച്ചേരിയിൽനിന്ന് തലമുണ്ട, അയിലക്കാട്, നടുവട്ടംവഴി പോകണം. പട്ടാമ്പിയിൽനിന്ന് പൊന്നാനി ഭാഗത്തേക്കുവരുന്ന വാഹനങ്ങൾ വട്ടംകുളത്തുനിന്ന് പഞ്ചായത്ത് ഓഫീസ് റോഡ്, നെല്ലിശ്ശേരി, നടുവട്ടം വഴിയും പോകണം. തൃശ്ശൂർ -കോഴിക്കോട് പാതയിൽ ഗതാഗതം തടയില്ലെങ്കിലും കഴിഞ്ഞദിവസം മുകളിലേക്ക് കയറ്റിയ ബീമിന്റെ ഒരു ഭാഗം തള്ളിനിൽക്കുന്നതിനാൽ വലിയ വാഹനങ്ങൾ ടൗണിൽനിന്ന് പൊന്നാനി റോഡിലേക്ക് തിരിഞ്ഞ് പഴയ ബ്ലോക്ക്, പെരുമ്പറമ്പ് വഴി പോകണം.