തിരുനാവായയിൽ കാണാതായ 60കാരനെ ഭാരതപ്പുഴയിൽ മരിച്ച നിലയിൽ കണ്ടെത്തി

കുറ്റിപ്പുറം : കഴിഞ്ഞ ദിവസം കാണാതായ 60 കാരൻ്റെ മൃതദേഹം ഭാരതപ്പുഴയിൽ കണ്ടെത്തി. തിരുന്നാവായ കൊടക്കൽ സ്വദേശി അറമുഖനെയാണ് ഭാരതപ്പുഴയിൽ മരിച്ച നിലയിൽ കണ്ടെത്തിയത്. അറമുഖനെ ഞായറാഴ്ച വൈകീട്ട് മുതൽ കാണാതായിരുന്നു. ഇതേ തുടർന്ന് വീട്ടുകാരും ബന്ധുക്കളും രാത്രി വരെ പല സ്ഥലങ്ങളിലും അന്വേഷണം നടത്തിയെങ്കിലും ഫലമുണ്ടായില്ല. ഇന്ന് രാവിലെയാണ് ഭാരതപ്പുഴയിൽ നിന്ന് അറമുഖൻ്റെ മൃതദേഹം ലഭിച്ചത്. തിരുന്നാവായ കടവിന് സമീപം സംശയകരമായ നിലയിൽ വസ്ത്രങ്ങൾ കണ്ടതോടെ നടത്തിയ തിരച്ചിലിലാണ് മൃതദേഹം ലഭിച്ചത്. ദീർഘ കാലം പ്രവാസിയായിരുന്നു ഇദ്ദേഹം. പ്രവാസ ജീവിതം മതിയാക്കിയ ശേഷം കന്നുകാലി വളർത്തിയാണ് കുടുംബം പോറ്റിയിരുന്നത്. മൃതദേഹം തിരൂർ ജില്ലാ ആശുപത്രി മോർച്ചറിയിലേക്ക് മാറ്റി. തങ്കമണിയാണ് ഭാര്യ. സുനിൽകുമാർ, സുമ, സുനിത എന്നിവർ മക്കളാണ്.