കുറ്റിപ്പുറത്ത് മോഷണക്കേസിൽ ജാമ്യത്തിലിറങ്ങി മുങ്ങിയ പ്രതി 15 വർഷത്തിനുശേഷം പോലീസ് പിടിയിലായി

കുറ്റിപ്പുറം : മോഷണക്കേസിൽ ജാമ്യത്തിലിറങ്ങി മുങ്ങിയ പ്രതി 15 വർഷത്തിനുശേഷം പോലീസ് പിടിയിലായി. കൂട്ടായി ഏന്തിന്റെപുരയ്ക്കൽ ഹംസ ബാവയെ (37) ആണ് കുറ്റിപ്പുറം പോലീസ് അറസ്റ്റുചെയ്തത്. 2006-ൽ കുറ്റിപ്പുറത്തിനടുത്ത മൂടാലിൽ രാധാകൃഷ്ണൻ എന്നയാളിൽനിന്ന് ഹംസ ബാവയും മറ്റൊരാളും ചേർന്ന് 15,000 രൂപ തട്ടിയെടുത്ത കേസിൽ ഇയാളെ പോലീസ് അറസ്റ്റുചെയ്തിരുന്നു. പിന്നീട് ജാമ്യത്തിലിറങ്ങിയ ഇയാൾ കോടതിയിൽ ഹാജരാകാതെ മുങ്ങിനടക്കുകയായിരുന്നു.

പിടികിട്ടാപ്പുള്ളികളെയും ഗുണ്ടകളെയും പിടികൂടുന്ന പ്രത്യേക പദ്ധതിയുടെ ഭാഗമായി ജില്ലാ പോലീസ് മേധാവിയുടെ പ്രത്യേക നിർദേശപ്രകാരം ഇയാളെ തിരൂരിൽനിന്നാണ് പിടികൂടിയത്. എസ്‌.ഐ. പ്രമോദ്, സീനിയർ സിവിൽ പോലീസ് ഓഫീസർമാരായ ജയപ്രകാശ്, രാജേഷ്, സുമേഷ് എന്നിവരടങ്ങിയ സംഘമാണ് പ്രതിയെ അറസ്റ്റുചെയ്തത്.