പ്രകൃതിസംരക്ഷണ പ്രവർത്തനങ്ങളുമായി എം.ഇ.എസ്. എച്ച്.എസ്.എസ്സിലെ ഹരിതസേന

ഇരിമ്പിളിയം: ഒരാഴ്ചത്തെ പ്രകൃതി സംരക്ഷണ പ്രവർത്തനങ്ങളുമായി ഇരിമ്പിളിയം എം.ഇ.എസ്. ഹയർ സെക്കൻഡറി സ്‌കൂളിലെ ദേശീയ ഹരിതസേനാംഗങ്ങൾ. പ്ലസ്‌വൺ വിദ്യാർഥികളായ അംഗങ്ങൾ വ്യത്യസ്തങ്ങളായ പ്രവർത്തനങ്ങളാണ് ഒരാഴ്ചക്കിടെ നടത്തിയത്. സ്‌കൂളിനും സമീപത്തെ വീടുകളിലും പക്ഷികൾക്കും മൃഗങ്ങൾക്കും കുടിവെള്ളത്തിന് സൗകര്യമൊരുക്കൽ, വീട്ടുകാരെ ജലസംരക്ഷണത്തെക്കുറിച്ച് ബോധവത്ക്കരിക്കൽ, സ്‌കൂളിലേയും സമീപത്തെ വീടുകളിലേയും പ്ലാസ്റ്റിക് മാലിന്യങ്ങൾ നീക്കം ചെയ്യൽ, പാഴ്‌വസ്തുക്കളിൽനിന്നും പരിസ്ഥിത സൗഹൃദ ഉത്പന്നങ്ങൾ നിർമിക്കുകയും പ്രദർശിപ്പിക്കുകയും ചെയ്യൽ തുടങ്ങിയ പ്രവർത്തനങ്ങളാണ് ഇവർ നടത്തിയത്. പ്രിൻസിപ്പൽ സി.എം. ഫിറോസും ഹരിതസേന കോ-ഓർഡിനേറ്റർ എം.വി. ഷാഹിനയും നേതൃത്വംനൽകി.