വട്ടപ്പാറയിലെ അപകട പരമ്പര; പരിഹാരം ദേശീയപാതയുടെ വികസനം മാത്രമെന്ന് കലക്‌ടർ

വട്ടപ്പാറയിൽ തുടർച്ചയായി ഉണ്ടാകുന്ന അപകടങ്ങൾക്കു ശാശ്വത പരിഹാരം ദേശീയപാതയുടെ വികസനം മാത്രമാണന്ന് കലക്‌ടർ അമിത് മീണ പറഞ്ഞു. ഓരോ അപകടം നടക്കുമ്പോഴും നടത്തിയിട്ടുള്ള പരിഷ്കാരങ്ങൾ അപകടത്തിന് അറുതി വരുത്തിയതായി കാണുന്നില്ല. ഇപ്പോഴത്തെ അപകടത്തിന്റെ പശ്ചാത്തലത്തിൽ പ്രദേശത്തു ചെയ്യാൻ പറ്റുന്ന പ്രവർത്തിയെപ്പറ്റി റിപ്പോർട്ട് സമർപ്പിക്കാൻ ദുരന്തനിവാരണ വിഭാഗത്തെ കലക്‌ടർ ചുമതലപ്പെടുത്തി.

പുതിയ ഡ്രൈവർമാരാണു മേഖലയിൽ കൂടുതൽ അപകടമുണ്ടാക്കുന്നതെന്ന് യോഗത്തിൽ പങ്കെടുത്ത പൊതുമരാമത്ത് ദേശിയപാതാ വിഭാഗം എക്സിക്യൂട്ടിവ് എൻജിനിയർ സി.കെ.മുഹമ്മദ് ഇസ്‌മായിൽ അറിയിച്ചു. ഇത്തരം ഡ്രൈവർമാർക്കു തുടർച്ചയായ രണ്ടു വളവുകളെ നേരിടാൻ കഴിയാതെ പോകുന്നു. ഇതിനു പുറമേ ദ്രാവകം കയറ്റിവരുന്ന വാഹനങ്ങളെ വളവിൽ നിയന്ത്രിക്കാൻ കഴിയാത്തതും അപകടത്തിനു കാരണമാണ്.