ഗംഗോത്രി കാളികാംബ പീഠം മഠാധിപതിക്ക് കാടാമ്പുഴയിലും കോട്ടയ്ക്കലിലും സ്വീകരണം

കോട്ടയ്ക്കൽ : ഗംഗോത്രി കാളികാംബ പീഠം മഠാധിപതി നാരായണതീർഥ ശങ്കരാചാര്യസ്വാമികൾ കാടാമ്പുഴ ഭഗവതീ ക്ഷേത്രവും കോട്ടയ്ക്കൽ കൈലാസമന്ദിരവും സന്ദർശിച്ചു. ബുധനാഴ്ച രാവിലെ കാടാന്പുഴ ക്ഷേത്രത്തിലെത്തിയ മഠാധിപതിയെ മേൽശാന്തി ഹരി എമ്പ്രാന്തിരി ദേവസ്വം ഗസ്റ്റ് ഹൗസ് പരിസരത്ത് പൂർണകുംഭം നൽകി സ്വീകരിച്ചു. എക്സിക്യുട്ടീവ് ഓഫീസർ എ.എസ്. അജയകുമാർ, ദേവസ്വം ഓഫീസ് സൂപ്രണ്ട് പി.പി. മീര, ക്ഷേത്രം സൂപ്രണ്ട് പി.കെ. രവി, പി. വിക്രമൻ എന്നിവരും ജീവനക്കാരും ചേർന്ന് മഠാധിപതിയെ ക്ഷേത്രസന്നിധിയിലേക്ക് ആനയിച്ചു.

പൂർണകുംഭത്തോടെയും മംഗളവാദ്യത്തോടെയുമാണ് കൈലാസമന്ദിരത്തിലേക്ക് സ്വാമികളെ സ്വീകരിച്ചത്. ട്രസ്റ്റി പി. രാഘവവാരിയർ പൂർണകുംഭം നൽകി സ്വീകരിച്ചു. സി.ഇ.ഒ. ഡോ. ജി.സി. ഗോപാലപിള്ള, ട്രസ്റ്റി കെ.ആർ. അജയ്, ജോയന്റ് ജനറൽ മാനേജർ പി. രാജേന്ദ്രൻ, കൺസൾട്ടന്റ് കെ.വി. രാമചന്ദ്രവാരിയർ, ചീഫ് ഫെസിലിറ്റി മാനേജ്മെന്റ് പി.എസ്. സുരേന്ദ്രൻ, ഹെഡ് മെറ്റീരിയൽസ് ഷൈലജാ മാധവൻകുട്ടി, ചീഫ് ഫിനാൻസ് ഗംഗ ആർ. വാരിയർ, ലക്ഷ്മി ആർ. വാരിയർ, സുഭദ്രാ രാമചന്ദ്രൻ എന്നിവരും പങ്കെടുത്തു. വിശ്വംഭര ക്ഷേത്രദർശനം നടത്തുകയും അനുഗ്രഹഭാഷണം നടത്തുകയും ചെയ്തു.