കരേക്കാട് നെയ്തലപ്പുറം ക്ഷേത്രത്തിൽ സാമൂഹിക വിരുദ്ധരുടെ വിളയാട്ടം; പ്രതിഷ്ഠകൾ നശിപ്പിച്ചു

എടയൂർ: കരേക്കാട് നെയ്തലപ്പുറത്ത് ശ്രീ ധർമ്മ ശാസ്താ ക്ഷേത്രത്തിൽ സാമൂഹിക വിരുദ്ധരുടെ വിളയാട്ടം. വിവിധ പ്രതിഷ്ഠകൾ നശിപ്പിച്ചു. ക്ഷേത്രത്തിനകത്തേക്ക് മനുഷ്യ വിസർജ്ജ്യം വലിച്ചെറിഞ്ഞതായും പരാതി. ക്ഷേത്രത്തിലെ ബ്രഹ്മരക്ഷസിന്റെയും നാഗരാജാവിന്റെയും പ്രതിഷ്ഠ പറിച്ചിട്ട നിലയിലായിരുന്നു. ക്ഷേത്രം ഭാരവാഹികൾ നൽകിയ പരാതിയിൽ വളാഞ്ചേരി പോലീസ് കേസെടുത്ത് അന്വേഷണം തുടങ്ങി.

ഇന്ന് രാവിലെ ക്ഷേത്രം ഭാരവാഹി ക്ഷേത്രത്തിലെത്തി പാട്ട് വക്കുവാൻ എത്തിയപ്പോഴാണ് സംഭവമറിഞ്ഞത്. ക്ഷേത്രത്തിനകത്തേക്ക് മനുഷ്യ വിസർജ്ജ്യം കവറിൽ കെട്ടി വലിച്ചെറിയുകയായിരുന്നുവെന്ന് ക്ഷേത്രം ഭാരവാഹികൾ പറഞ്ഞു. ക്ഷേത്രം വളർന്നു വരുന്നതിൽ അസൂയ പൂണ്ട ചിലരുടെ പ്രവൃത്തിയാകാമിതെന്ന് ഭാരവാഹികൾ മാധ്യമങ്ങളോട് പറഞ്ഞു.

വിവരമറിഞ്ഞ് കോട്ടക്കൽ നിയോജക മണ്ഡലം എം.എൽ.എ പ്രൊഫ. ആബിദ് ഹുസൈൻ തങ്ങൾ, എടയൂർ ഗ്രാമ പഞ്ചായത്ത് പ്രസിഡന്റ് കെ.കെ രാജീവ് മാസ്റ്റർ, മാറാക്കര ഗ്രാമ പഞ്ചായത്ത് പ്രസിഡന്റ് വി മധുസൂധനൻ തൂടങ്ങിയവർ ക്ഷേത്രത്തിൽ എത്തി.