bus Archives - Valanchery Online

കുറ്റിപ്പുറം പൈങ്കണ്ണൂരിൽ ബസ് ഡിവൈഡറിൽ ഇടിച്ച് കയറി യാത്രക്കാരിക്ക് പരിക്ക്

വളാഞ്ചേരിക്കാരൻ — Tue, 07 Jan 2025 02:38:00 +0000

കുറ്റിപ്പുറം: ദേശീയപാത 66ലെ കുറ്റിപ്പുറം പൈങ്കണ്ണൂരിൽ നിയന്ത്രണം വിട്ട ബസ് ഡിവൈഡറിൽ ഇടിച്ച് കയറിയതിനെ തുടർന്ന് ഒരാൾക്ക് പരിക്ക്. തിരുവനന്തപുരത്ത് നിന്ന് കർണാടകയിലെ ഉടുപ്പിയിലേക്ക് പോവുകയായിരുന്ന കല്ലട ട്രാവൽസിന്റെ ബസാണ് അപകടത്തിൽ പെട്ടത്. അപകടത്തിൽ ബസ് ഡ്രൈവർക്കും യാത്രകാരിയായ എറണാകുളം അങ്കമാലി സ്വദേശിനി സ്വർണ്ണ (27)നും പരിക്കേറ്റു. യാത്രക്കാരിയെ വളാഞ്ചേരിയിലെ സ്വകാര്യ ആശുപത്രിയിൽ പ്രവേശിപ്പിച്ചു. ഇന്ന് പുലർച്ചെ 3.30 ഓടെയാണ് അപകടമുണ്ടായത്. ദേശീയപാതയിൽ പൈങ്കണ്ണൂർ സ്കൂളിന് സമീപം നിർമ്മാണം പുരോഗമിക്കുന്ന ഇടത്ത് ഗതാഗതം വഴി തിരിച്ച് വിടാൻ സ്ഥാപിച്ച ഡിവൈഡറിലേക്ക് ബസ് ഇടിച്ച് കയറുകയായിരുന്നു. അപകടത്തെ തുടർന്ന് ഹൈവേ പോലീസും നാട്ടുകാരും ദേശീയപാത നിർമ്മാണ കരാർ കമ്പനി ജീവനക്കാരും ചേർന്ന് രക്ഷ പ്രവർത്തനം നടത്തി.

The post കുറ്റിപ്പുറം പൈങ്കണ്ണൂരിൽ ബസ് ഡിവൈഡറിൽ ഇടിച്ച് കയറി യാത്രക്കാരിക്ക് പരിക്ക് appeared first on Valanchery Online.

കുറ്റിപ്പുറം നഗരത്തിൽ വൺവെ തെറ്റിച്ചു വന്ന ബസിടിച്ച് സ്കൂട്ടർ യാത്രക്കാരിക്ക് പരിക്ക്

വളാഞ്ചേരിക്കാരൻ — Wed, 25 Sep 2024 12:54:18 +0000

കുറ്റിപ്പുറം: കോഴിക്കോട് തൃശൂർ റൂട്ടിൽ സർവീസിനടുത്തുന്ന ബ്ലൂഡയമണ്ട് ബസാണ് അപകടം വരുത്തിവെച്ചത്
ഇന്ന് രാവിലെ ഒമ്പത് മണിയോടെയാണ് തിരൂർ റോഡ് ജംഗ്ഷനിൽ വൺവെ തെറ്റിച്ചു വന്ന ബസ് സ്കൂട്ടറിലിടിച്ച് യാത്രക്കാരിക്ക് പരിക്കേറ്റത്. യാത്രക്കാരിയെ ആശുപത്രിയിൽ പ്രവേശിപ്പിച്ചു. ടൗൺ ബസ്സ്റ്റാൻഡിലേക്കുള്ള ബസുകൾ അമിതവേഗത്തിൽ എതിർദിശയിലൂടെ ബസ് സ്റ്റാൻഡിലേക്ക് പ്രവേശിക്കുന്നത് മുൻപും അപകടങ്ങൾക്ക് കാരണമായിരുന്നു. തിരൂർ റോഡ് ജങ്ഷനിൽനിന്നു തിരൂർ റോഡ് വഴി ബി.എസ്.എൻ.എൽ. ഓഫീസിനു മുൻപിലൂടേയുള്ള വൺവേ റോഡ് വഴി വേണം ബസ് സ്റ്റാൻഡിലേക്ക് ബസ്സുകൾ പ്രവേശിക്കാൻ. എന്നാൽ മിക്ക ബസുകളും തിരൂർ റോഡ് ജങ്ഷനിൽനിന്നും തിരിയാതെ നേരെ റെയിൽവേ സ്റ്റേഷൻ റോഡ് വഴി ബസ് സ്റ്റാൻഡിലേക്ക് പ്രവേശിക്കുകയാണ്.

ഇത്തരത്തിൽ അമിതവേഗത്തിലെത്തുന്ന ബസുകൾക്ക് മുൻപിൽ കാർ, ഓട്ടോറിക്ഷ, ഇരുചക്രവാഹനം തുടങ്ങിയവ അപകടത്തിൽപ്പെടുന്നത് വർധിക്കുകയാണ്. കഴിഞ്ഞ ഞായറാഴ്ച വൈകുന്നേരം റെയിൽവേ സ്റ്റേഷനിൽനിന്നും യാത്രക്കാരുമായി വരുകയായിരുന്ന കാർ അമിതവേഗത്തിലെത്തിയ ബസിനു മുൻപിൽനിന്ന് അപകടത്തിൽപ്പെടാതെ രക്ഷപ്പെട്ടത് തല നാരിഴയ്ക്കാണ്. തിരൂർ റോഡ് ജങ്ഷനിൽനിന്ന് നേരെ ബസ് സ്റ്റാൻഡ് റോഡിലേക്ക് ബസുകൾ ഉൾപ്പെടെ വലിയ വാഹനങ്ങൾ പ്രവേശിക്കാതിരിക്കാൻ അറിയിപ്പ് ബോർഡും ബാരിക്കേഡും നേരത്തെ സ്ഥാപിച്ചിരുന്നു. ഏതാനും മാസം മുൻപ് ഒരു സ്വകാര്യ ലിമിറ്റഡ് സ്റ്റോപ്പ് ബസ് ഈ ബാരിക്കേഡ് ഇടിച്ചു തകർത്ത് ബസ് സ്റ്റാൻഡിലേക്ക് കയറി. സംഭവം വിവാദമായപ്പോൾ ബാരിക്കേഡ് ബസുടമ തന്നെ നിർമിച്ചുനൽകാമെന്ന് പോലീസിന് ഉറപ്പു നൽകിയിരുന്നെങ്കിലും ഇതുവരെ പുതിയത് സ്ഥാപിച്ചിട്ടിട്ടില്ല. കഴിഞ്ഞമാസം ബസ് സ്റ്റാൻഡിലെ പോലീസ് എയ്ഡ് പോസ്റ്റിന്റെ പുനരാംഭ ഉദ്ഘാടനവേളയിൽ ടൗണിൽ അടിയന്തരമായി ഗതാഗതപരിഷ്കരണം നടപ്പാക്കുമെന്ന് പോലീസ് പ്രഖ്യാപിച്ചിരുന്നെങ്കിലും ആ പ്രഖ്യാപനവും നടപ്പായിട്ടില്ല.

The post കുറ്റിപ്പുറം നഗരത്തിൽ വൺവെ തെറ്റിച്ചു വന്ന ബസിടിച്ച് സ്കൂട്ടർ യാത്രക്കാരിക്ക് പരിക്ക് appeared first on Valanchery Online.

എടപ്പാള്‍ മേല്‍പ്പാലത്തില്‍ കെഎസ്ആര്‍ടിസി ബസും പിക്കപ്പ് വാനും കൂട്ടിയിടിച്ചു; വാൻ ഡ്രൈവർക്ക് ദാരുണാന്ത്യം

വളാഞ്ചേരിക്കാരൻ — Thu, 21 Mar 2024 05:48:54 +0000

എടപ്പാള്‍: മേല്‍പ്പാലത്തില്‍ കെഎസ്ആര്‍ടിസി ബസും പിക്കപ്പ് വാനും കൂട്ടിയിടിച്ച് ഉണ്ടായ അപകടത്തില്‍ ഒരാള്‍ മരിച്ചു. ഇടിയുടെ ആഘാതത്തില്‍ വാഹനത്തില്‍ കുടുങ്ങിയ പിക്കപ്പ് വാനിലെ ഡ്രൈവര്‍ പാലക്കാട് സ്വദേശി രാജേന്ദ്രന്‍ (50) ആണ് മരിച്ചത്. പിക്കപ്പ് വാനില്‍ കുടുങ്ങിയ രാജേന്ദ്രനെ ഫയര്‍ഫോഴ്‌സ് എത്തി രണ്ടരമണിക്കൂര്‍ നീണ്ട പരിശ്രമത്തിന് ഒടുവില്‍ പുറത്തെടുത്ത് ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാന്‍ സാധിച്ചില്ല. പിക്കപ്പ് വാന്‍ വെട്ടിപ്പൊളിച്ചാണ് രാജേന്ദ്രനെ പുറത്തെടുത്തത്. പരിക്കേറ്റ മറ്റു യാത്രക്കാരെ ആശുപത്രിയിലേക്ക് മാറ്റി. ഇവരുടെ ആരുടെയും പരിക്ക് ഗുരുതരമല്ല എന്നാണ് റിപ്പോര്‍ട്ടുകള്‍. ഇന്ന് പുലര്‍ച്ചെ കെഎസ്ആര്‍ടിസി ബസും പിക്കപ്പ് വാനും നേര്‍ക്കുനേര്‍ കൂട്ടിയിടിക്കുകയായിരുന്നു. തൃശൂര്‍ ഭാഗത്ത് നിന്ന് കോഴിക്കോട് ഭാഗത്തേയ്ക്ക് പോകുകയായിരുന്നു കെഎസ്ആര്‍ടിസി ബസ്. എടപ്പാള്‍ മേല്‍പ്പാലത്തില്‍ വച്ച് എതിര്‍ദിശയില്‍ നിന്ന് വന്ന പിക്കപ്പ് വാനുമായി കൂട്ടിയിടിക്കുകയായിരുന്നു. അപകടത്തെ തുടര്‍ന്ന് പ്രദേശത്ത് ഗതാഗത കുരുക്ക് അനുഭവപ്പെട്ടു. ഓരോ നിമിഷവും നിരവധി വാഹനങ്ങളാണ് എടപ്പാള്‍ മേല്‍പ്പാലം വഴി കടന്നുപോകുന്നത്. അതുകൊണ്ട് തന്നെ അപകടത്തെ തുടര്‍ന്ന് വലിയ ഗതാഗത കുരുക്കാണ് അനുഭവപ്പെട്ടത്.

The post എടപ്പാള്‍ മേല്‍പ്പാലത്തില്‍ കെഎസ്ആര്‍ടിസി ബസും പിക്കപ്പ് വാനും കൂട്ടിയിടിച്ചു; വാൻ ഡ്രൈവർക്ക് ദാരുണാന്ത്യം appeared first on Valanchery Online.

കുറ്റിപ്പുറത്ത് സ്വകാര്യ ബസും ടിപ്പർ ലോറിയും കൂട്ടിയിടിച്ച് നിരവധി പേർക്ക് പരിക്ക്

വളാഞ്ചേരിക്കാരൻ — Sun, 12 Nov 2023 02:51:47 +0000

കുറ്റിപ്പുറം: ദേശീയപാത 66ലെ മലപ്പുറം കുറ്റിപ്പുറത്ത് വച്ചുണ്ടായ വാഹനാപകടത്തിൽ നിരവധി പേർക്ക് പരിക്ക്. കുറ്റിപ്പുറം കെ.എസ്.ഡി.സിക്ക് സമീപത്ത് ഇന്ന് രാവിലെയാണ് അപകടമുണ്ടായത്. കോഴിക്കോട് നിന്നും തൃശൂർ ഭാഗത്തേക്ക് പോവുകയായിരുന്ന സ്വകാര്യ ബസും എതിരെ വരികയായിരുന്ന ടിപ്പർ ലോറിയും തമ്മിൽ കൂട്ടിയിടിക്കുകയായിരുന്നു. സംഭവത്തിൽ പരിക്കേറ്റവരെ കുറ്റിപ്പുറം താലൂക്ക് അശുപത്രിയിലും വളാഞ്ചേരിലെയും കോട്ടക്കലിലെയും സ്വകാര്യ അശുപത്രികളിലുമായും പ്രവേശിപ്പിച്ചു. കൂടുതൽ വിവരങ്ങൾ അറിവായി വരുന്നു. കുറ്റിപ്പുറം പോലീസ് മേൽനടപടികൾ സ്വീകരിച്ചു.

The post കുറ്റിപ്പുറത്ത് സ്വകാര്യ ബസും ടിപ്പർ ലോറിയും കൂട്ടിയിടിച്ച് നിരവധി പേർക്ക് പരിക്ക് appeared first on Valanchery Online.

കുറ്റിപ്പുറം കെ.എം.സി.ടി. കോളേജിൽ നിന്ന് പഠനയാത്ര കഴിഞ്ഞു മടങ്ങിയ വിദ്യാർഥികൾക്കുനേരേ അക്രമം; അധ്യാപകനുൾപ്പെടെ 11 പേർക്കു പരിക്ക്

വളാഞ്ചേരിക്കാരൻ — Thu, 19 Oct 2023 23:51:33 +0000

ചാലിശ്ശേരി: കുറ്റിപ്പുറം കെ.എം.സി.ടി. കോളേജിൽനിന്ന് നെല്ലിയാമ്പതിയിലേക്കു പഠനയാത്ര നടത്തി തിരിച്ചുവരികയായിരുന്ന വിദ്യാർഥിസംഘത്തിനു നേരെ അക്രമം. ബസിലെ പെൺകുട്ടികളെ ശല്യംചെയ്തതിനെ ചോദ്യംചെയ്ത ആൺകുട്ടികളും അധ്യാപകരുമാണു ആറങ്ങോട്ടുകരയിൽ ക്രൂരമായ ആക്രമണത്തിനിരയായത്. ഒരധ്യാപകനുൾപ്പെടെ ഏഴുപേരെ പട്ടാമ്പിയിലെ സ്വകാര്യ ആശുപത്രിയിലും നാലു പെൺകുട്ടികളെ പട്ടാമ്പി താലൂക്ക് ആശുപത്രിയിലും പ്രവേശിപ്പിച്ചു. ബസിന്‍റെ ചില്ലുകളും അടിച്ചുതകർത്തു. അധ്യാപകൻ സുബൈറിന്റെ കൈയുടെ എല്ലു പൊട്ടിയിട്ടുണ്ട്. ഇരുമ്പകശ്ശേരി സ്വദേശികളായ ജുനൈദ് (23), ജുബൈർ (26) എന്നിവരുടെ നേതൃത്വത്തിലാണ് അക്രമം നടന്നതെന്നു ചാലിശ്ശേരി പോലീസ് പറഞ്ഞു. ഇരുവരും കൊലപാതകക്കേസുകളിൽ പ്രതിയാണെന്നും പോലീസ് പറഞ്ഞു.

വ്യാഴാഴ്ച വൈകീട്ട്‌ 6.30-നാണ് സംഭവം. കുറ്റിപ്പുറം കെ.എം.സി.ടി. കോളേജിലെ രണ്ടാംവർഷ ബി.എസ്.ഡബ്ല്യു. ബാച്ചിലെ വിദ്യാർഥികളും രണ്ട് അധ്യാപകരുമടക്കം 30 പേരാണ് ബസിലുണ്ടായിരുന്നത്. ഒരു അധ്യാപകനെ വീട്ടിലിറക്കാനായി ആറങ്ങോട്ടുകരയിൽ ബസ് നിർത്തിയതായിരുന്നു. ഈ സമയത്ത് ബസിലെ പെൺകുട്ടികളെ സംഘം ശല്യപ്പെടുത്തി. ഇതിനെ അധ്യാപകരും മറ്റു കുട്ടികളും ചോദ്യംചെയ്യുകയും ചെയ്തു. ഇതിൽ പ്രകോപിതരായ സംഘം വീട്ടിൽച്ചെന്ന് ആയുധങ്ങളുമായി തിരിച്ചെത്തി വിദ്യാർഥികളെയും അധ്യാപകരെയും ആക്രമിക്കുകയായിരുന്നെന്നു പോലീസ് പറഞ്ഞു.

വിദ്യാർഥികളെ അടിച്ചുവീഴ്ത്തുന്ന ദൃശ്യങ്ങൾ നാട്ടുകാർ പകർത്തിയിട്ടുണ്ട്. പോലീസ് സംഭവസ്ഥലത്തെത്തിയപ്പോഴേക്കും അക്രമികൾ രക്ഷപ്പെട്ടു. പ്രതികൾക്കായി അന്വേഷണം ശക്തമാക്കിയതായും പോലീസ് അറിയിച്ചു.

The post കുറ്റിപ്പുറം കെ.എം.സി.ടി. കോളേജിൽ നിന്ന് പഠനയാത്ര കഴിഞ്ഞു മടങ്ങിയ വിദ്യാർഥികൾക്കുനേരേ അക്രമം; അധ്യാപകനുൾപ്പെടെ 11 പേർക്കു പരിക്ക് appeared first on Valanchery Online.

വളാഞ്ചേരി കുളമംഗലത്ത് ബസ് ബൈക്കിലിടിച്ച് 2 പേർ മരിച്ചു

വളാഞ്ചേരിക്കാരൻ — Wed, 14 Jun 2023 12:49:04 +0000

വളാഞ്ചേരി: വളാഞ്ചേരിയിൽ ബസ് ബൈക്കിലിടിച്ച് രണ്ട് പേർ മരിച്ചു. സംസ്ഥാന പാത 73ലെ കൊളമംഗലത്താൺ ഇന്ന് വൈകീട്ട് അപക്ടമുണ്ടായത്. വൈകിട്ട് 4.30 ന് കൊളമംഗലം കൃഷിഭവനു സമീപമാണ് അപകടം. അതിഥി തൊഴിലാളികളായ 2 പേരാണ് മരണമടഞ്ഞത്. വളാഞ്ചേരിയിൽ നിന്ന് പെരിന്തൽമണ്ണ ഭാഗത്തേക്ക് പോകുന്ന ബൈക്ക് യാത്രികർ എതിരെ വളാഞ്ചേരിയിലേക്ക് വരുന്ന സ്വകാര്യ ബസിൽ ഇടിക്കുകയായിരുന്നു. ഇരുവരും സംഭവ സ്ഥലത്തു തന്നെ മരിച്ചു. മൃതദേഹങ്ങൾ വളാഞ്ചേരിയിലെ സ്വകാര്യ ആശുപത്രിയിലേക്ക് മാറ്റി.

The post വളാഞ്ചേരി കുളമംഗലത്ത് ബസ് ബൈക്കിലിടിച്ച് 2 പേർ മരിച്ചു appeared first on Valanchery Online.

കെ.എസ്.ആർ.ടി.സി ബസില്‍ യുവതിക്കുനേരെ പീഡനശ്രമം: യുവാവ് വളാഞ്ചേരിയിൽ കസ്റ്റഡിയില്‍

വളാഞ്ചേരിക്കാരൻ — Mon, 22 May 2023 05:09:03 +0000

വളാഞ്ചേരി: ബസിൽ യാത്ര ചെയ്യുകയായിരുന്ന യുവതിക്കു നേരെ പീഢന ശ്രമം. പത്തനംതിട്ട ഭാഗത്തേക്ക് വരികയായിരുന്ന കെ.എസ്.ആർ.ടി.സി ബസിൽ ഇന്ന് പുലർച്ചെ ഒരു മണിയോടെയാണ് സംഭവമുണ്ടായത്. കണ്ണൂരില്‍ നിന്നും കയറിയ യുവതിക്ക് നേരെയാണ് പീഡനശ്രമമുണ്ടായത്. ഇരുവരും സമീപത്തുള്ള സീറ്റുകളിലായിരുന്നു ഇരുന്നത്. കോഴിക്കോട് കഴിഞ്ഞതോടെ യുവാവ് അപമര്യാദയായി പെരുമാറുകയായിരുന്നു.

യുവതിയുടെ ശരീരത്തില്‍ ഇയാള്‍ സ്പര്‍ശിക്കാന്‍ ശ്രമിച്ചുവെന്നാണ് ലഭ്യമാകുന്ന വിവരം. ഇതോടെ പോലീസിന്റെ ടോള്‍ ഫ്രീ നമ്പറിലേക്ക് യുവതി വിവരം കൈമാറുകയായിരുന്നു. തുടര്‍ന്ന് മലപ്പുറം വളാഞ്ചേരിയില്‍ വച്ച് ബസ് തടഞ്ഞ് പോലീസ് ഇയാളെ കസ്റ്റഡിയിലെടുക്കുകയായിരുന്നു.

The post കെ.എസ്.ആർ.ടി.സി ബസില്‍ യുവതിക്കുനേരെ പീഡനശ്രമം: യുവാവ് വളാഞ്ചേരിയിൽ കസ്റ്റഡിയില്‍ appeared first on Valanchery Online.

എടരിക്കോട്ട് ബസുകൾ കൂട്ടിയിടിച്ച് 32 പേർക്ക് പരിക്ക്

വളാഞ്ചേരിക്കാരൻ — Sat, 08 Apr 2023 00:44:42 +0000

കോട്ടയ്ക്കൽ : എടരിക്കോട്-തിരൂർ റോഡിൽ മൂച്ചിക്കലിൽ നാലുവാഹനങ്ങൾ ഉൾപ്പെട്ട അപകടത്തിൽ മുപ്പത്തിരണ്ടു പേർക്ക് പരിക്ക്. പരിക്കേറ്റവരെ കോട്ടയ്ക്കൽ ചങ്കുവെട്ടി അൽമാസ് ആശുപത്രിയിൽ പ്രവേശിപ്പിച്ചു. ആരുടെയും പരിക്ക് ഗുരുതരമല്ല.

വെള്ളിയാഴ്ച ഉച്ചയ്ക്ക് രണ്ടേകാലോടെയാണ് അപകടം. മഞ്ചേരിയിൽനിന്ന് തിരൂരിലേക്കുപോവുകയായിരുന്ന മാനൂസ് ബസും തിരൂരിൽനിന്ന് മഞ്ചേരിയിലേക്കുപോവുകയായിരുന്ന കെ.ടി.ആർ. ബസുമാണ് മുഖാമുഖം കൂട്ടിയിടിച്ചത്. രണ്ടുകാറുകളും അപകടത്തിൽപ്പെട്ടു. ഒരുബസിനുപിന്നിൽ ഒരുകാറിടിച്ചു. മറ്റൊരുബസ് കാറുമായും കൂട്ടിയിടിച്ചു.

അരമണിക്കൂറോളം എടരിക്കോട്- തിരൂർ റൂട്ടിൽ ഗതാഗതം തടസ്സപ്പെട്ടു. നാട്ടുകാരും കല്പകഞ്ചേരി, കോട്ടയ്ക്കൽ സ്റ്റേഷനുകളിൽനിന്നെത്തിയ പോലീസുമാണ് രക്ഷാപ്രവർത്തനങ്ങൾ നടത്തിയത്.

The post എടരിക്കോട്ട് ബസുകൾ കൂട്ടിയിടിച്ച് 32 പേർക്ക് പരിക്ക് appeared first on Valanchery Online.

കെ.എസ്.ആർ.ടി.സി.ക്കൊപ്പം വേനലവധി ആഘോഷിക്കാം; ഏപ്രിൽ, മേയ് മാസങ്ങളിലായി 62 ബജറ്റ് ഫ്രണ്ട്‌ലി ട്രിപ്പുകൾ

വളാഞ്ചേരിക്കാരൻ — Mon, 03 Apr 2023 05:52:34 +0000

മലപ്പുറം : വേനലവധിക്ക് സ്കൂളുകൾ പൂട്ടിയതോടെ വിനോദസഞ്ചാരത്തിനു തയ്യാറെടുക്കുന്ന കുടുംബങ്ങൾക്കു കെ.എസ്.ആർ.ടി.സി.ക്കൊപ്പം യാത്ര പോകാം. ഏപ്രിൽ, മേയ് മാസങ്ങളിലായി 62 ബജറ്റ് ഫ്രണ്ട്‌ലി ട്രിപ്പുകളാണ് ഒരുക്കിയിട്ടുള്ളത്. മലപ്പുറം ഡിപ്പോയിൽനിന്നാണ് കൂടുതൽ യാത്രകൾ ഒരുക്കിയിട്ടുള്ളത്. എട്ടുമുതൽ 30 വരെയുള്ള ദിവസങ്ങളിൽ 14 ട്രിപ്പുകളും മേയിൽ 19 യാത്രകളുമാണ് ഇവിടെ നിന്നുള്ളത്. നിലമ്പൂർ, പെരിന്തൽമണ്ണ, പൊന്നാനി ഡിപ്പോകളിൽ നിന്നും യാത്രകളുമുണ്ട്. മൂന്നാർ, അതിരപ്പിള്ളി, മലക്കപ്പാറ, വയനാട് എന്നിവിടങ്ങളിലേക്കാണ് കൂടുതൽ ട്രിപ്പുകൾ. ഫോൺ: 9447203014, 9995726885, 9446389823.

The post കെ.എസ്.ആർ.ടി.സി.ക്കൊപ്പം വേനലവധി ആഘോഷിക്കാം; ഏപ്രിൽ, മേയ് മാസങ്ങളിലായി 62 ബജറ്റ് ഫ്രണ്ട്‌ലി ട്രിപ്പുകൾ appeared first on Valanchery Online.

പുത്തനത്താണിയിൽ സ്വകാര്യ ബസ്സും ഓട്ടോയും കാറും കൂട്ടിയിടിച്ചു ; ഒരാൾക്ക് പരിക്ക്

വളാഞ്ചേരിക്കാരൻ — Sat, 07 Jan 2023 09:28:43 +0000

ആതവനാട്: ദേശീയപാത 66ലെ പുത്തനത്താണിയിൽ സ്വകാര്യ ബസ്സും ഓട്ടോയും കാറും കൂട്ടിയിടിച്ച് അപകടം. ചുങ്കം വളവിൽ ശനിയാഴ്ച രാവിലെ 8.30 ഓടെയാണ് സംഭവം. സമീപ റോഡിൽ നിന്നും കയറിയെത്തിയ കാർ വളാഞ്ചേരി ഭാഗത്തു നിന്നും വന്ന ഓട്ടോയുമായി ഇടിക്കുകയും തുടർന്ന് നിയന്ത്രണം നഷ്ടപ്പെട്ട ഓട്ടോ കോട്ടയ്ക്കൽ ഭാഗത്തു നിന്നും വരികയായിരുന്ന ബസ്സുമായി കൂട്ടിയിടിക്കുകയുമായിരുന്നു അപകടത്തിൽ ഓട്ടോ ഡ്രൈവറായ പുതുപ്പറമ്പ് സ്വദേശി കൂട്ടുവാല വീട്ടിൽ മൊയ്ദീനെ(65) പരുക്കുകളോടെ വളാഞ്ചേരിയിലെ സ്വകാര്യ ആശുപത്രിയിൽ പ്രവേശിപ്പിച്ചു. മഞ്ചേരിയിൽ നിന്നും കാടാമ്പുഴയിലേയ്ക്ക് സഞ്ചരിച്ച കാരപ്പാസ് എന്ന ബസ്സാണ് അപകടത്തിൽപെട്ടത്. പൊലീസെത്തി നടപടികൾ സ്വീകരിച്ചു.

The post പുത്തനത്താണിയിൽ സ്വകാര്യ ബസ്സും ഓട്ടോയും കാറും കൂട്ടിയിടിച്ചു ; ഒരാൾക്ക് പരിക്ക് appeared first on Valanchery Online.

തിരൂരിൽ നിന്ന് വിനോദയാത്രക്ക് പോയ സംഘം സഞ്ചരിച്ച ബസ് അപകടത്തിൽപെട്ടു; ആതവനാട് സ്വദേശിക്ക് ദാരുണാന്ത്യം

വളാഞ്ചേരിക്കാരൻ — Sun, 01 Jan 2023 09:08:12 +0000

തിരൂർ: തിരൂരിലെ വിദ്യാഭ്യാസ സ്ഥാപനത്തിലെ വിദ്യാർത്ഥികളുമായി പുറപ്പെട്ട ബസ് ഇടുക്കിയിൽ അപകടത്തിൽപ്പെട്ടു. ആതവനാട് സ്വദേശി മിൻഹാജ് ആണ് മരിച്ചത്. പുതുവൽസര ആഘോഷങ്ങളുടെ ഭാഗമായി ആണ് വിനോദയാത്ര സംഘടിപ്പിച്ചത്. ഇടുക്കി കല്ലാര്‍കൂട്ടി മൈലാടുംപാറ റൂട്ടില്‍ തിങ്കള്‍കാട്ടിലാണ് അപകടം. ഇന്ന് പുലര്‍ച്ചെ ഒന്നേ കാലോടെയാണ് അപകടം നടന്നത്. നിയന്ത്രണം വിട്ട വാഹനം കൊക്കയിലേയ്ക്ക് മറിയുകയായിരുന്നു.

വാഹനത്തിലുണ്ടായിരുന്ന നാല്‍പ്പത്തിനാല് പേരെയും നാട്ടുകാരും ഫയര്‍ഫോഴ്സും പൊലീസും ചേര്‍ന്ന് രക്ഷപ്പെടുത്തി. പരിക്കേറ്റവര്‍ അടിമാലി താലൂക്ക് ആശുപത്രിയില്‍ ചികിത്സയിലാണ്. വിനോദ യാത്രയ്ക്കായിട്ടെത്തിയ വിദ്യാര്‍ത്ഥി സംഘം തിരികെ മടങ്ങുന്നതിനിടയിലാണ് അപകടം നടന്നത്. കല്ലാര്‍കൂട്ടി മൈലാടും പാറ റൂട്ടില്‍ മുനിയറയില്‍ നിന്നും ഒന്നര കിലോമീറ്റര്‍ മാറി തിങ്കള്‍ക്കാടിന് സമീപം കുത്തിറക്കവും കൊടും വളവുമായതിനാൽ നിയന്ത്രണം വിട്ട് ബസ്സ് കൊക്കയിലേയ്ക്ക് പതിക്കുകയായിരുന്നു. വലിയ ശബ്ദ്ദം കേട്ട് എത്തിയ നാട്ടുകാരാണ് ആദ്യം രക്ഷാപ്രവര്‍ത്തനം നത്തിയയത്. തുടര്‍ന്ന് ഫയര്‍ ഫോഴ്സും. വിവിധ സ്റ്റേഷനുകളില്‍ നിന്നുള്ള പൊലീസും സ്ഥലത്തെത്തി രക്ഷാ പ്രവര്‍ത്തനം നടത്തി.

The post തിരൂരിൽ നിന്ന് വിനോദയാത്രക്ക് പോയ സംഘം സഞ്ചരിച്ച ബസ് അപകടത്തിൽപെട്ടു; ആതവനാട് സ്വദേശിക്ക് ദാരുണാന്ത്യം appeared first on Valanchery Online.

കുറ്റിപ്പുറത്ത് യാത്രാക്കൂലിയിൽ ഇളവുനൽകാതെ വിദ്യാർഥിനികളെ ബസിൽനിന്ന്‌ ഇറക്കിവിട്ടതായി പരാതി

വളാഞ്ചേരിക്കാരൻ — Tue, 29 Nov 2022 01:28:51 +0000

കുറ്റിപ്പുറം : യാത്രാക്കൂലിയിൽ ഇളവുനൽകാതെ കണ്ടക്ടർ വിദ്യാർഥിനികളെ ബസിൽനിന്ന്‌ ഇറക്കിവിട്ടതായി പരാതി. തിങ്കളാഴ്‌ച രാവിലെ 8.40-ന് എടപ്പാളിൽനിന്ന്‌ വളാഞ്ചേരിയിലെ കോളേജിലേക്ക് പോകുന്നതിനായി സ്വകാര്യ ബസിൽ കയറിയ ഒൻപത്‌ വിദ്യാർഥിനികളെയാണ് കുറ്റിപ്പുറം ബസ്‍സ്റ്റാൻഡിൽ ഇറക്കിവിട്ടത്. ഇളവ് അനുവദിക്കില്ലെന്നും മുഴുവൻ തുകയും നൽകിയാൽ മാത്രമേ യാത്ര തുടരാൻ അനുവദിക്കൂവെന്നും കണ്ടക്ടർ പറഞ്ഞു. ഇതിന് വിദ്യാർഥിനികൾ തയ്യാറാകാത്തതിനാലാണ് ഇറക്കിവിട്ടത്. വിദ്യാർഥികൾ മോട്ടോർവാഹന വകുപ്പിൽ പരാതി നൽകി.

The post കുറ്റിപ്പുറത്ത് യാത്രാക്കൂലിയിൽ ഇളവുനൽകാതെ വിദ്യാർഥിനികളെ ബസിൽനിന്ന്‌ ഇറക്കിവിട്ടതായി പരാതി appeared first on Valanchery Online.