ലോക പഞ്ചഗുസ്തിയിൽ പങ്കെടുക്കാൻ സഹായം തേടി മത്സരാർഥി

വളാഞ്ചേരി : ലോക പഞ്ചഗുസ്തി മത്സരത്തിൽ പങ്കെടുക്കാൻ യോഗ്യത നേടിയിട്ടും സാമ്പത്തികപ്രയാസം കാരണം അവസരം നഷ്ടപ്പെടുമെന്ന ആശങ്കയിൽ യുവാവ്. വളാഞ്ചേരിക്കടുത്ത് വലിയകുന്നിലെ പി.സി. അക്ബറാണ് ഒക്ടോബർ 26 മുതൽ നവംബർ ഒന്നുവരെ അസർബൈജാനിൽ നടക്കുന്ന മത്സരത്തിൽ സാമ്പത്തിക ബുദ്ധിമുട്ടിനാൽ പങ്കെടുക്കാൻ കഴിയാത്ത അവസ്ഥയിലുള്ളത്. ജനപ്രതിനിധികളെയും വകുപ്പുമന്ത്രിയെയും ഇക്കാര്യം അറിയിച്ചിട്ടുണ്ടെങ്കിലും അനുകൂല മറുപടി കിട്ടിയിട്ടില്ലെന്നും അദ്ദേഹം പറഞ്ഞു. ലോക പഞ്ചഗുസ്തി ചാമ്പ്യൻഷിപ്പിൽ പങ്കെടുക്കാൻ നേരത്തേ നടന്ന മത്സരത്തിൽ വെള്ളിമെഡൽ നേടിയാണ് യോഗ്യത നേടിയത്. സമയമാകുമ്പോഴേക്കും ഭാഗ്യം തുണയ്ക്കുമെന്ന പ്രതീക്ഷയിൽ വളാഞ്ചേരിയിലെ ഹെൽത്ത് ക്ലബ്ബിൽ തീവ്രപരിശ്രമത്തിലാണ് യുവാവ്. പഞ്ചഗുസ്തി താരങ്ങളെ സർക്കാർ അവഗണിക്കുന്നതിനാൽ ഇതരസംസ്ഥാനങ്ങൾക്കും വിദേശരാജ്യങ്ങൾക്കുംവേണ്ടി പലരും കുപ്പായമണിയുകയാണെന്ന് അക്ബർ പറഞ്ഞു. പി. സുധീഷ് പൂക്കാട്ടിരിയും പത്രസമ്മേളനത്തിൽ പങ്കെടുത്തു.