‘വേർ ഈസ് മൈ ട്രെയിൻ’ ആപ്പിലെ ടിക്കറ്റ് നിരക്കിൽ മാറ്റംവരുത്തി; നടപടി കുറ്റിപ്പുറത്തെ പൊതു പ്രവർത്ത്കൻ നൽകിയ പരാതിയെ തുടർന്ന്

കുറ്റിപ്പുറം : തീവണ്ടികൾ ഏത് റെയിൽവേ സ്റ്റേഷനിലെത്തിയെന്നതും സമയവുമറിയാനായി യാത്രക്കാർ ഉപയോഗിക്കുന്ന വേർ ഈസ് മൈ ട്രെയിൻ ആപ്ലിക്കേഷനിലെ തീവണ്ടിയുടെ ടിക്കറ്റ് നിരക്കിൽ മാറ്റം വരുത്തി. ഷൊർണൂർ- കണ്ണൂർ സ്പെഷ്യൽ (06031) എക്സ്പ്രസിന്റെ മിനിമം ചാർജാണ് 10 രൂപയിൽ നിന്നും 30 രൂപയിലേക്ക് മാറ്റിയത്.

ഈ ആപ്ലിക്കേഷനിലെ ടിക്കറ്റ് നിരക്കിലെ അപാകം ചൂണ്ടിക്കാട്ടി കുറ്റിപ്പുറത്തെ പൊതുപ്രവർത്തകനായ അസ്കർ കൊളത്തോൾ പാലക്കാട് റെയിൽവേ ഡിവിഷൻ അധികൃതർക്ക് പരാതി നൽകിയിരുന്നു. എന്നാൽ, വേർ ഈസ് മൈ ട്രെയിൻ ആപ്പ് റെയിൽവെയുടെ ഔദ്യോഗിക ആപ്പ് അല്ലെന്നും പരാതി ശ്രദ്ധിക്കാമെന്നും പാലക്കാട് ഡിവിഷൻ ഓഫീസ് അദ്ദേഹത്തെ അറിയിച്ചിരുന്നു. കഴിഞ്ഞ ദിവസം മുതലാണ് ആപ്ലിക്കേഷനിലെ ടിക്കറ്റ് നിരക്കിൽ മാറ്റം വരുത്തിയത്.