actor Archives - Valanchery Online

സിനിമ – ടെലിവിഷൻ താരം സുബി സുരേഷ് അന്തരിച്ചു

വളാഞ്ചേരിക്കാരൻ — Wed, 22 Feb 2023 05:34:04 +0000

കൊച്ചി: സിനിമ – ടെലിവിഷൻ താരം സുബി സുരേഷ് (42) അന്തരിച്ചു. കൊച്ചി രാജഗിരി ആശുപത്രിയിലായിരുന്നു അന്ത്യം. കരൾ സംബന്ധമായ രോഗത്തെ തുടർന്ന് ചികിത്സയിലായിരുന്നു. ഇതിനിടെ ന്യുമോണിയ ബാധിച്ച് നില ഗുരുതരമാവുകയായിരുന്നു. ഇന്ന് രാവിലെ പത്ത് മണിക്കായിരുന്നു അന്ത്യം. എറണാകുളം ജില്ലയിലെ തൃപ്പൂണിത്തുറയിലായിരുന്നു സുബി ജനിച്ചത്. തൃപ്പൂണിത്തുറ സർക്കാർ സ്‌കൂളിലും എറണാകുളം സെന്റ് തെരേസാസിലുമായിരുന്നു സ്‌കൂൾ – കോളേജ് വിദ്യാഭ്യാസം. അച്ഛൻ: സുരേഷ്, അമ്മ: അംബിക, സഹോദരൻ: എബി സുരേഷ്. സ്‌കൂള്‍ പഠനകാലത്ത് ബ്രേക്ക് ഡാൻസിനോടായിരുന്നു സുബിക്ക് പ്രിയം. ഇതിലൂടെയാണ് കലാരംഗത്തേക്കെത്തിയത്. വിദേശരാജ്യങ്ങളിലും ധാരാളം സ്റ്റേജ് ഷോകൾ അവതരിപ്പിച്ചിട്ടുണ്ട്. സിനിമാല, കുട്ടിപ്പട്ടാളം തുടങ്ങിയ പരിപാടികളിലൂടെ ടെലിവിഷൻ പ്രേക്ഷകരുടെ പ്രിയങ്കരിയായി.

രാജസേനൻ സംവിധാനം ചെയ്ത കനക സിംഹാസനം എന്ന ചിത്രത്തിലൂടെയാണ് സിനിമയിലെത്തിയത്. എൽസമ്മ എന്ന ആൺകുട്ടി, പഞ്ചവർണ തത്ത തുടങ്ങി ഇരുപതിലധികം സിനിമകളിൽ അഭിനയിച്ചു. അടുത്തിടെ യൂട്യൂബിലും സജീവമായിരുന്നു. കൊവിഡിന് ശേഷം സുബിക്ക് ആരോഗ്യപ്രശ്നങ്ങൾ ഉണ്ടായിരുന്നതായി സുഹൃത്തുക്കൾ പറയുന്നു.

The post സിനിമ – ടെലിവിഷൻ താരം സുബി സുരേഷ് അന്തരിച്ചു appeared first on Valanchery Online.

നെടുമുടി വേണുവിന്റെ ചിതാഭസ്മം തിരുനാവായ നിളാ നദിയിൽ നിമജ്ജനംചെയ്തു

വളാഞ്ചേരിക്കാരൻ — Sun, 21 Nov 2021 02:40:40 +0000

തിരുനാവായ: നെടുമുടി വേണുവിന്റെ ചിതാഭസ്മം തിരുനാവായ നിളാ നദിയിൽ ശനിയാഴ്ച രാവിലെ എട്ടോടെ നിമജ്ജനംചെയ്തു. ഭാര്യ ടി.ആർ. സുശീല, മക്കളായ ഉണ്ണി ഗോപാൽ, കണ്ണൻ ഗോപാൽ എന്നിവരും കുടുംബാംഗങ്ങളും ചടങ്ങിനെത്തി. തിലഹോമം, സായൂജ്യപൂജ, താമരമാല എന്നീ വഴിപാടുകളും നടത്തി. സി.പി. ഉണ്ണിക്കൃഷ്ണൻ ഇളയത് കാർമികത്വം വഹിച്ചു.

The post നെടുമുടി വേണുവിന്റെ ചിതാഭസ്മം തിരുനാവായ നിളാ നദിയിൽ നിമജ്ജനംചെയ്തു appeared first on Valanchery Online.

ഗോൾഡൻ വിസ ഏറ്റുവാങ്ങാൻ ദുബായിലെത്തിയ ടോവിനോയ്ക്ക് താൻ വരച്ച ചിത്രം സമ്മാനിക്കാൻ അവസരം ലഭിച്ച ഗോൾഡൻ ചാൻസ് ലഭിച്ച ത്രില്ലിൽ എടയൂർ സ്വദേശി സൗപർണ്ണിക

വളാഞ്ചേരിക്കാരൻ — Fri, 03 Sep 2021 09:27:06 +0000

ദുബായ്: യു.എ.ഇ സർക്കാർ നൽകുന്ന ഗോൾഡൻ വിസ കൈപറ്റാൻ ദുബായിലെത്തിയ യുവ നടൻ ടൊവീനോ തോമസിനെ നേരിൽ കാണാനും താൻ വരച്ച ചിത്രം പ്രിയ നടനെ ഏൽപ്പിക്കാനും കഴിഞ്ഞതിൻ്റെ സന്തോഷത്തിലാണ് എടയൂർ സ്വദേശിയായ സൗപർണിക ദീപക്. ഗോൾഡൻ വീസ വാങ്ങാൻ നടൻ ടൊവിനോ തോമസ് ദുബായിൽ എത്തി എന്നറിഞ്ഞപ്പോൾ മുതൽ കാണാനായി തിടുക്കം കൂട്ടുകയായിരുന്നു. പിതാവ് ദീപക് പനങ്ങാട്ടിനോടും അമ്മ ഹിമയോടും ആഗ്രഹം പങ്കുവച്ചു. ടോവീനോയുടെ ബന്ധു വഴിയാണ് നടനെ കാണാനുള്ള സാഹചര്യം ഒത്തു വന്നതെന്ന് ദീപക് പറഞ്ഞു. നടനെ കണ്ടതോടെ താൻ വരച്ച ചിത്രം സൗപർണ്ണിക ടൊവീനോയ്ക്ക് കൈമാറി. സൗപർണ്ണിക സമ്മാനിച്ച ചിത്രം കണ്ട് ടൊവീനോ അഭിനന്ദിക്കാനും മറന്നില്ല. കൂടെ കുടുംബവുമൊത്തുള്ള ഒരു ഫോട്ടോയ്ക്ക് പോസ് ചെയ്തു നടൻ. ഇതോടെ സൗപർണ്ണികയും അനുജൻ ക്രിഷിവും പെരുത്ത് ഹാപ്പി. ദുബൈയിൽ അൽ ഫുതൈമിലെ ജീവനക്കാരനാണ് മലപ്പുറം വളാഞ്ചേരി എടയൂർ മഠത്തിൽ ദീപക് പനങ്ങാട്. അൽ വർക്ക ജെംസ് അവർ ഓൺ സ്കൂളിലെ ഈ ആറാം ക്ലാസുകാരിയാണ് സൗപർണ്ണിക.

The post ഗോൾഡൻ വിസ ഏറ്റുവാങ്ങാൻ ദുബായിലെത്തിയ ടോവിനോയ്ക്ക് താൻ വരച്ച ചിത്രം സമ്മാനിക്കാൻ അവസരം ലഭിച്ച ഗോൾഡൻ ചാൻസ് ലഭിച്ച ത്രില്ലിൽ എടയൂർ സ്വദേശി സൗപർണ്ണിക appeared first on Valanchery Online.

നടൻ അനിൽ നെടുമങ്ങാട് മുങ്ങിമരിച്ചു

വളാഞ്ചേരിക്കാരൻ — Fri, 25 Dec 2020 14:46:14 +0000

തിരുവനന്തപുരം: നടൻ അനിൽ നെടുമങ്ങാട് മുങ്ങിമരിച്ചു. തൊടുപുഴക്ക് സമീപം മലങ്കര ജലാശയത്തിൽ നീന്തവെ കയത്തിൽപ്പെട്ട് മുങ്ങിമരിക്കുകയായിരുന്നു എന്നാണു പ്രാഥമിക വിവരം. 48 വയസായിരുന്നു. നടൻ കുളിക്കാനായി ഇറങ്ങിയപ്പോഴാണ് കയത്തിൽ പെടുന്നത്. അയ്യപ്പനും കോശിയും, കമ്മട്ടിപ്പാടം തുടങ്ങിയ സിനിമയിൽ പ്രധാന നടനായി അഭിനയിച്ചിട്ടുണ്ട്. സിനിമാ ഷൂട്ടിങ്ങുമായി തൊടുപുഴയിൽ എത്തിയതായിരിന്നു.

അദ്ദേഹത്തിന്റെ മൃതദേഹം രക്ഷാപ്രവര്‍ത്തകര്‍ കരയ്ക്ക് എത്തിച്ചിട്ടുണ്ട്. സച്ചി സംവിധാനം ചെയ്ത അയ്യപ്പനും കോശിയും എന്ന ചിത്രത്തിലെ സി.ഐയുടെ റോളിൽ ഗംഭീര പ്രകടനം നടത്തി അനിൽ നിരൂപക പ്രശംസ നേടിയിരുന്നു. സച്ചിയുടെ ജന്മദിനമായ ഇന്ന് അദ്ദേഹത്തിന് അനുശോചനം നേര്‍ന്ന് മണിക്കൂറുകൾ മുൻപാണ് അനിൽ ഫേസ്ബുക്കിൽ പോസ്റ്റിട്ടിരുന്നു.

ഈ ദിവസം ഇങ്ങേരെ കുറിച്ചാണ് എഴുതേണ്ടത് .. ഒന്നും എഴുതാനും കഴിയുന്നില്ല. ഞാനും മരിക്കുവോളം എഫ് ബി യിലെ കവർ ഫോട്ടോയായിട്ട്…

Posted by Anil P. Nedumangad on Thursday, 24 December 2020

The post നടൻ അനിൽ നെടുമങ്ങാട് മുങ്ങിമരിച്ചു appeared first on Valanchery Online.

നടൻ ശശി കലിംഗ അന്തരിച്ചു

വളാഞ്ചേരിക്കാരൻ — Tue, 07 Apr 2020 01:52:12 +0000

കോഴിക്കോട്: ചലച്ചിത്ര താരം ശശി കലിംഗ (59) അന്തരിച്ചു. വി. ചന്ദ്രകുമാര്‍ എന്നാണ് യഥാര്‍ത്ഥ പേര്. പാലേരി മാണിക്യം കേരള കഫേ, വെള്ളിമൂങ്ങ,ആമ്മേന്‍ തുടങ്ങി നിരവധി സിനിമകളില്‍ അഭിനയിച്ചിട്ടുണ്ട്. കോഴിക്കോട്‌ സ്വകാര്യ ആശുപത്രിയില്‍ വച്ച്‌ ഇന്ന് പുലര്‍ച്ചെയായിരുന്നു അന്ത്യം. കരള്‍ രോഗബാധിതനായി ചികിത്സയിലായിരുന്നു

നാടക രംഗത്ത് തിളങ്ങി നിന്നിരുന്ന കലിംഗ ശശി ഹാസ്യകഥാപാത്രങ്ങളിലൂടെയാണ് ജനഹൃദയങ്ങള്‍ കീഴടക്കിയത്. ഇരുപത്തിയഞ്ച് വര്‍ഷത്തോളം നാടകരംഗത്ത് പ്രവര്‍ത്തിച്ചു. 500-ലധികം നാടകങ്ങളില്‍ അഭിനയിച്ച അദ്ദേഹം ‘പാലേരിമാണിക്യം ഒരു പാതിരാക്കൊലപാതകത്തിന്റെ കഥ’ എന്ന രഞ്ജിത്ത്‌ ചിത്രത്തിലൂടെയാണ് വെളളിത്തിരയില്‍ അരങ്ങേറ്റം കുറിച്ചത്. പ്രഭാവതിയാണ് ഭാര്യ. കേരളാകഫേ,പ്രാഞ്ചിയേട്ടന്‍ ആന്റ് ദ സെയിന്റ്, ഇന്ത്യന്‍ റുപ്പി,ആമ്മേന്‍, അമര്‍ അക്ബര്‍ ആന്റണി,വെള്ളിമൂങ്ങ, ആദമിന്റെ മകന്‍ അബു തുടങ്ങി നിരവധി സിനിമകളില്‍ അഭിനയിച്ചിട്ടുണ്ട്.

The post നടൻ ശശി കലിംഗ അന്തരിച്ചു appeared first on Valanchery Online.

സിനിമയിലെ നായകൻ ജീവിതത്തിലും നായകനായി: മോഷ്ടാക്കളെ അതിസാഹസികമായി നേരിട്ട് നടൻ അനീഷ് ജി മേനോൻ. വീഡിയോ കാണാം

വളാഞ്ചേരിക്കാരൻ — Fri, 29 Dec 2017 02:54:27 +0000

വളാഞ്ചേരി: കുറ്റവാളികളെ കീഴ്പ്പെടുത്തി വിജയിച്ചു വരുന്ന നാ‍യകസങ്കൽ‌പങ്ങൾ സിനിമയിൽ സുപരിചിതമെങ്കിലു, ജീവിതത്തിലും അത് ശരി തന്നെയെന്ന് തെളിയിച്ചിരിക്കുകയാണ് നടൻ അനീഷ് ജി മേനോൻ. തന്റെ അയൽ‌വാസിയെ അക്രമിച്ച് പണം തട്ടുന്നതറിഞ്ഞ് അനീഷ് കാണിച്ച മനസാന്നിധ്യവും ധൈര്യവുമാണ് അക്രമികളിൽ ഒരാളെ പിടികൂടുന്നതിനു വഴിവച്ചത്. വളാഞ്ചേരി സഹകരണ ബാങ്കിലെ കളക്ഷൻ ഏജന്റും നഗരസഭാ വൈസ് ചെയർമാനുമായ കെ.വി ഉണ്ണിക്കൃഷ്‌ണനെ വീട്ടിലേക്ക് മടങ്ങുന്ന വഴി ബൈക്കിലെത്തി അക്രമിച്ച് ബാഗ് തട്ടിയെടുത്ത് രക്ഷപ്പെടാൻ ശ്രമിച്ച മൂന്നംഗസംഘത്തെയാണ് അനീഷ് ഒറ്റയ്ക്ക് നേരിട്ടത്. ഇതിൽ ഒരാളെ പിടികൂടാനും അനീഷിനു കഴിഞ്ഞു. അക്രമികളുമായുള്ള മൽ‌പിടുത്തത്തിനിടെ അനീഷിന്റെ ശരീരത്തിൽ പരിക്കുകളേറ്റിരുന്നു. തുടർന്ന് നടക്കാവിൽ ആശുപത്രിയിൽ ചികിത്സ തേടി.

സുരേഷ്‌ഗോപി എം.പി കാടാമ്പുഴ ക്ഷേത്രത്തില്‍ ദര്‍ശനം നടത്തി

വളാഞ്ചേരിക്കാരൻ — Wed, 11 Jan 2017 10:39:14 +0000

വളാഞ്ചേരി: സുരേഷ്‌ഗോപി എം.പി. കാടാമ്പുഴ ക്ഷേത്രത്തില്‍ ദര്‍ശനം നടത്തി.

ബുധനാഴ്ച രാവിലെ ഒമ്പതിന് ക്ഷേത്രത്തിലെത്തിയ എം.പിയേയും കുടുംബത്തേയും എക്‌സിക്യൂട്ടീവ് ഓഫീസര്‍ ടി.സി. ബിജു, മാനേജര്‍ അപ്പുവാരിയര്‍, സൂപ്രണ്ട് എം.വി. മുരളീധരന്‍, ക്ഷേത്രം ജീവനക്കാര്‍ തുടങ്ങിയവര്‍ ചേര്‍ന്ന് സ്വീകരിച്ചു.

പുണെയില്‍നിന്നുള്ള മടക്കയാത്രയിലാണ് അദ്ദേഹം ഇവിടെയെത്തിയത്. ആലത്തിയൂര്‍ ഹനുമാന്‍കാവിലും അദ്ദേഹം ദര്‍ശനം നടത്തി. ഹനുമാന് കുഴച്ച അവില്‍, വെള്ള അവില്‍, കദളിക്കുല എന്നിവ സമര്‍പ്പിച്ചു. പിന്നീട് ഗുരുവായൂരിലേക്ക് പോയി.

കാടാമ്പുഴ ക്ഷേത്രത്തിന് പിന്‍ഭാഗത്തുള്ള ചിറ ജലസംഭരണിയാക്കിമാറ്റാന്‍ ഇരുപതുലക്ഷം അനുവദിക്കുമെന്ന് സുരേഷ്‌ഗോപി എം.പി.പറഞ്ഞു. പ്രധാനമന്ത്രിയുടെ പ്രസാദം പദ്ധതിയില്‍ നിന്നും സാമ്പത്തിക സഹായം ലഭ്യമാക്കാന്‍ നടപടി സ്വീകരിക്കുമെന്നും അദ്ദേഹം പറഞ്ഞു.

The post സുരേഷ്‌ഗോപി എം.പി കാടാമ്പുഴ ക്ഷേത്രത്തില്‍ ദര്‍ശനം നടത്തി appeared first on Valanchery Online.