Trafficking Archives - Valanchery Online

മോഡലിംഗിന്റെ മറവിൽ സെക്‌സ് റാക്കറ്റ്; ഒരു യുവതി കൂടി അറസ്റ്റിൽ

വളാഞ്ചേരിക്കാരൻ — Tue, 19 May 2026 05:04:53 +0000

കൊച്ചി: സ്ത്രീകളെ വിദേശത്തേക്ക് കടത്തി ലൈംഗികചൂഷണത്തിന് ഇരയാക്കിയിരുന്ന സംഘത്തിലെ ഒരാൾ കൂടി പിടിയിൽ. പൊന്നാനി സ്വദേശി മഞ്ജിമ ആണ് പിടിയിലായത്. നേരത്തെ ഗുരുവായൂ‌ർ സ്വദേശി ടോയ്സി സിന്ധു, മോഡലും തിരുവനന്തപുരം പോങ്ങുവിള സ്വദേശിയുമായ അലീന എബ്രഹാം (23) എന്നിവരെ കൊച്ചി സിറ്റി പൊലീസ് അറസ്റ്റ് ചെയ്തിരുന്നു. അലീനയെ മരട് പൊലീസ് സ്റ്റേഷന് സമീപമുള്ള ഫ്ലാറ്റിൽ നിന്നാണ് കസ്റ്റഡിയിലെടുത്തത്. മുംബയ് വിമാനത്താവളം വഴി വിദേശത്തേക്ക് കടക്കാൻ ശ്രമിച്ച ടോയ്സി സിന്ധുവിനെ കൊച്ചി സിറ്റി പൊലീസ് പുറപ്പെ‌ടുവിച്ച ലുക്കൗട്ട് സർക്കുലറിനെ തുടർന്ന് എമിഗ്രേഷൻ വിഭാഗം വിമാനത്താവളത്തിൽ തടഞ്ഞുവച്ച് മുംബയ് സഫർ പൊലീസിന് കൈമാറുകയായിരുന്നു.മോഡലിംഗിന്റെ മറവിൽ കൊച്ചി കേന്ദ്രീകരിച്ച് നടന്ന മനുഷ്യക്കടത്തിലും ലൈംഗികപീഡനത്തിലും നിരവധി യുവതികൾ ഇരയായെന്നാണ് സൂചന. മോഡലിംഗിന് പുറമെ, വിദേശത്ത് ഉയർന്ന ജോലികളും വാഗ്ദാനം ചെയ്തിരുന്നു. ദുബായിൽ എത്തിച്ചശേഷം ഹോട്ടലുകളിൽ കൊണ്ടുപോയി ശീതളപാനീയത്തിൽ മയക്കുമരുന്ന് കലർത്തി നൽകി ബോധംകെടുത്തി പുരുഷൻമാർക്ക് കാഴ്ച വയ്‌ക്കും. നഗ്നദൃശ്യങ്ങൾ പകർത്തും. ദൃശ്യങ്ങൾ കാട്ടി ഭീഷണിപ്പെടുത്തി തുടർച്ചയായി പീഡനത്തിന് ഇരയാക്കുകയാണ് രീതി.സംഘത്തിന്റെ പിടിയിൽ നിന്ന് രക്ഷപ്പെട്ട് കൊച്ചിയിൽ തിരിച്ചെത്തിയ സ്ത്രീ നൽകിയ പരാതിയിൽ മരട് പൊലീസ് കേസെടുത്തിരുന്നു. പിന്നാലെ രണ്ട് സ്ത്രീകളും പരാതി നൽകി. അറസ്റ്റിലായ അലീനയ്ക്കെതിരെ വൈറ്റിലയിലെ ബാറിൽ മദ്യപിച്ച് ബഹളമുണ്ടാക്കിയതിന് മരട് പൊലീസ് കേസെടുത്തിരുന്നു. അലീനയ്ക്ക് ഗുണ്ടകളുമായി ബന്ധമുണ്ടെന്നും പൊലീസ് പറയുന്നു.

The post മോഡലിംഗിന്റെ മറവിൽ സെക്‌സ് റാക്കറ്റ്; ഒരു യുവതി കൂടി അറസ്റ്റിൽ appeared first on Valanchery Online.

പിഞ്ചുകുഞ്ഞിനെ ഒന്നര ലക്ഷം രൂപയ്ക്ക് വിറ്റു; തിരൂരിൽ അമ്മയും കാമുകനുമുൾപ്പെടെ അഞ്ചുപേർ അറസ്റ്റിൽ

വളാഞ്ചേരിക്കാരൻ — Wed, 18 Jun 2025 01:28:32 +0000

തിരൂർ : ഒൻപതുമാസം പ്രായമുള്ള പെൺകുഞ്ഞിനെ ഒന്നരലക്ഷം രൂപയ്ക്ക് വിറ്റ കേസിൽ കുഞ്ഞിന്റെ അമ്മയും കാമുകനുമുൾപ്പെടെ അഞ്ചുപേർ അറസ്റ്റിൽ. കുഞ്ഞിന്റെ മാതാവ് തമിഴ്നാട് കള്ളക്കുറിശ്ശി നെടുമാണൂർ ശങ്കരപുരം സ്വദേശിനി കീർത്തന (23), കാമുകനും ഓട്ടോ ഡ്രൈവറുമായ കള്ളക്കുറിശ്ശി പിള്ളയാർ കോവിൽ സ്ട്രീറ്റിൽ നത്തകരൈ ആത്തൂർ സ്വദേശി ശിവ (24), കുട്ടിയെ വിലയ്ക്കു വാങ്ങിയ കോഴിക്കോട് കല്ലായി ചക്കുംകടവ് സ്വദേശി കവിതാലയത്തിൽ രാജഗോപാലിന്റെ ഭാര്യ ആദിലക്ഷ്മി (39), ഇടനിലക്കാരായി നിന്ന തിരൂരിൽ താമസിക്കുന്ന സെന്തിൽകുമാർ (49), ഭാര്യ കോഴിക്കോട് ചക്കുംകടവ് സ്വദേശിനി പ്രേമലത (46) എന്നിവരാണ് അറസ്റ്റിലായത്.

കുഞ്ഞിന്റെ പിതൃത്വത്തെച്ചൊല്ലിയുണ്ടായ അഭിപ്രായവ്യത്യാസത്തെത്തുടർന്ന് കീർത്തനയെ ഭർത്താവ് അയ്യപ്പൻ ഉപേക്ഷിക്കുകയായിരുന്നുവെന്ന് പോലീസ് പറഞ്ഞു. തുടർന്ന് ശിവയുമായി കീർത്തന പ്രണയത്തിലാകുകയും കുട്ടിയുമായി ശിവയ്ക്കൊപ്പം തിരൂരിലെത്തി സുഹൃത്തിന്റെ വീട്ടിൽ താമസിക്കുകയായിരുന്നു. ഇതിനിടെ, കീർത്തന വീണ്ടും ഗർഭിണിയായി. സാമ്പത്തിക ഭദ്രതയില്ലാത്തതിനാൽ ആദ്യ ഭർത്താവിലെ കുഞ്ഞിനെ വിൽക്കാൻ തീരുമാനിക്കുകയായിരുന്നുവെന്ന് പോലീസ് പറഞ്ഞു. മൂന്നുലക്ഷം രൂപയാണ് കുട്ടിയുടെ വിലയായി ചോദിച്ചതെങ്കിലും ഒന്നര ലക്ഷം രൂപയ്ക്ക് ഉറപ്പിക്കുകയായിരുന്നു. ഞായറാഴ്ച ആദിലക്ഷ്മി തിരൂരിലെത്തി പണംനൽകി കുട്ടിയുമായി പോയി. സമീപവാസികളിൽനിന്ന് വിവരം ലഭിച്ച പോലീസ്, കീർത്തനയുടെ ഫോൺ രേഖകൾ പരിശോധിച്ചാണ് കുട്ടിയെ വാങ്ങിയവരെയും സഹായിച്ചവരെയും പിടികൂടിയത്. കീർത്തനയുടെ കൈയിൽനിന്ന് 1,38,000 രൂപയും പോലീസ് പിടിച്ചെടുത്തു.

തിരൂർ എസ്ഐ ആർ.പി. സുജിത്ത്, എസ്ഐമാരായ ബാബുജി, പ്രതീഷ് കുമാർ, ജയപ്രകാശ്, എഎസ്ഐ രാജേഷ്, സീനിയർ സിപിഒമാരായ അരുൺ, രാജേഷ്, ജയപ്രകാശ്, സിപിഒ ഷാമില ഷാജി, കൈലാസ് എന്നിവർ ചേർന്നാണ് പ്രതികളെ അറസ്റ്റു ചെയ്തത്. പ്രതികളെ തിരൂർ ഒന്നാം ക്ലാസ് ജുഡീഷ്യൽ മജിസ്ട്രേറ്റ് കോടതിയിൽ ഹാജരാക്കി റിമാൻഡ് ചെയ്തു. കുട്ടിയെ പോലീസ് ചൈൽഡ് വെൽഫെയർ കമ്മിറ്റി അംഗം അഡ്വ. രാജേഷ് പുതുക്കാട് മുൻപാകെ ഹാജരാക്കി മലപ്പുറം ശിശുസംരക്ഷണ സമിതിക്ക് കീഴിലുള്ള ശിശു പരിപാലന കേന്ദ്രത്തിലേക്ക് മാറ്റി.

The post പിഞ്ചുകുഞ്ഞിനെ ഒന്നര ലക്ഷം രൂപയ്ക്ക് വിറ്റു; തിരൂരിൽ അമ്മയും കാമുകനുമുൾപ്പെടെ അഞ്ചുപേർ അറസ്റ്റിൽ appeared first on Valanchery Online.

അവയവക്കടത്തിനു ശ്രമം: വളാഞ്ചേരി സ്വദേശികളായ രണ്ടുപേർ അറസ്റ്റിൽ

വളാഞ്ചേരിക്കാരൻ — Thu, 05 Sep 2024 02:17:13 +0000

വളാഞ്ചേരി: അവയവക്കടത്തിനു ശ്രമിച്ചെന്ന പരാതിയിൽ രണ്ടുപേർ അറസ്റ്റിൽ. മലപ്പുറം വളാഞ്ചേരി സ്വദേശികളായ നജിമുദീൻ, ശശി എന്നിവരാണ് പിടിയിലായത്. ഇവർ അവയവക്കടത്ത് ഏജന്റുമാരായി പ്രവർത്തിക്കുന്നവരാണെന്നാണ് പോലീസിന്റെ സംശയം. വൃക്കയെടുക്കാൻ ശ്രമിച്ചെന്ന കടയ്ക്കാവൂർ സ്വദേശിനി നൽകിയ പരാതിയിലാണ് അറസ്റ്റ്.

കടയ്ക്കാവൂർ പോലീസ് സ്റ്റേഷനിൽ ലഭിച്ച പരാതിയിൽ വർക്കല എ.എസ്.പി. ദീപക് ധൻകറിന്റെ നേതൃത്വത്തിലുള്ള പ്രത്യേക അന്വേഷണസംഘം മലപ്പുറത്തുനിന്നാണ് പ്രതികളെ പിടികൂടിയത്. യുവതിയെ സംഘം എറണാകുളത്തെ സ്വകാര്യ ആശുപത്രിയിൽ എത്തിച്ച് പരിശോധനയ്ക്കു വിധേയയാക്കിയതായി പോലീസിനു വിവരം ലഭിച്ചിട്ടുണ്ട്. യുവതിയുമായി സംഘം എങ്ങനെ ബന്ധപ്പെട്ടു തുടങ്ങിയ വിവരങ്ങൾ പോലീസ് അന്വേഷിക്കുകയാണ്. കൂടുതൽ വിവരങ്ങൾ പോലീസ് വെളിപ്പെടുത്തിയിട്ടില്ല. അവയവക്കടത്ത് സംഘത്തിൽ കൂടുതൽപ്പേർ ഉൾപ്പെട്ടതായും സംശയിക്കുന്നു. പ്രതികളെ കസ്റ്റഡിയിൽ വാങ്ങി അന്വേഷണം നടത്തിയാലേ സംഘത്തെയും ഇവരുടെ പ്രവർത്തനങ്ങളെയുംകുറിച്ച് കൂടുതൽ വിവരങ്ങൾ ലഭിക്കൂവെന്ന് എ.എസ്.പി. അറിയിച്ചു. പ്രതികളെ ആറ്റിങ്ങൽ കോടതിയിൽ ഹാജരാക്കി റിമാൻഡു ചെയ്തു.

The post അവയവക്കടത്തിനു ശ്രമം: വളാഞ്ചേരി സ്വദേശികളായ രണ്ടുപേർ അറസ്റ്റിൽ appeared first on Valanchery Online.

മണൽക്കടത്ത്: വളാഞ്ചേരി സ്വദേശി അറസ്റ്റിൽ

വളാഞ്ചേരിക്കാരൻ — Fri, 04 Mar 2022 02:12:18 +0000

കുറ്റിപ്പുറം : ഭാരതപ്പുഴയിലെ പേരശ്ശന്നൂർ ഭാഗത്തുനിന്ന് മണൽക്കടത്ത്‌ നടത്തുന്നതിനിടെ യുവാവ് പോലീസ് വലയിലായി. വളാഞ്ചേരി സ്വദേശി കാളിയാല മുഹമ്മദ് ഹാരിസിനെയാണ് (20) കുറ്റിപ്പുറം പോലീസ് ബുധനാഴ്ച രാത്രിയിൽ അറസ്റ്റ്‌ ചെയ്തത്. കഴിഞ്ഞ ദിവസം പേരശ്ശന്നൂർ ഭാഗത്തുനിന്ന് കഞ്ചാവുമായി പിടിയിലായ അഷ്റഫ് അലിയുടെ കൂട്ടാളിയാണ് മുഹമ്മദ് ഹാരിസ്.

അഷ്റഫ് അലി പേരശ്ശന്നൂർ മേഖലയിൽനിന്ന് മണൽക്കടത്ത് നടത്തുന്നതിൽ പ്രധാനിയാണ്. പോലീസിനെ ആക്രമിച്ച കേസിലും പ്രതിയായ ഇയാൾ വലയിലായതോടെ സഹായികൾക്കായി പോലീസ് തിരച്ചിൽ ഊർജിതമാക്കിയിരുന്നു.

The post മണൽക്കടത്ത്: വളാഞ്ചേരി സ്വദേശി അറസ്റ്റിൽ appeared first on Valanchery Online.

തമിഴ്നാട്ടിലേക്കു അനധികൃത മണ്ണു കടത്ത്; കൊളത്തൂരിൽ ലോറി പിടികൂടി

വളാഞ്ചേരിക്കാരൻ — Mon, 08 Jun 2020 15:17:54 +0000

കൊളത്തൂർ: വാളയാർ സിമന്‍റ് ഫാക്ടറിയിലേക്കാണെന്നു പറഞ്ഞു ബില്ലുണ്ടാക്കി തമിഴ്നാട്ടിലേക്കു മണ്ണു കടത്തുന്ന പന്ത്രണ്ടു ചക്രമുള്ള ടോറസ് ലോറി കൊളത്തൂർ പോലീസ് പിടിച്ചെടുത്തു. രഹസ്യവിവരത്തെ തുടർന്നു ചട്ടിപ്പറന്പിലെ ഒരു സൈറ്റിൽ നിന്നു മണ്ണുമായി ഇന്നലെ പുലർച്ചെ രണ്ടു മണിക്കാണ് ടോറസ് പിടികൂടിയത്. പോലീസ് പരിശോധനയുണ്ടെന്ന് മനസിലാക്കി മണ്ണെടുത്തു കൊണ്ടിരുന്ന മറ്റു വാഹനങ്ങൾ ഉടൻ സൈറ്റിൽ നിന്നു മാറ്റുകയായിരുന്നു.

കോഡൂർ, കുറുവ വില്ലേജുകളൂടെ അതിർത്തിയിലുള്ള മലകൾ തുരന്നു ഖനനം ചെയ്യുന്നതിനെതിരെ സ്ഥല ഉടമകൾക്കെതിരെ നടപടി സ്വീകരിക്കുന്നതിനു ബന്ധപ്പെട്ട വില്ലേജു ഓഫീസർമാർക്കു റിപ്പോർട്ട് സമർപ്പിക്കുമെന്നും പോലീസ് അറിയിച്ചു. ടോറസിന്‍റെ ബോഡി ലെവലിൽ മണ്ണു നിറച്ച് ടാർപോളിൻ ഉപയോഗിച്ചു മൂടികെട്ടിയാണ് ഇത്തരം വാഹനങ്ങൾ പുലർച്ചെ പോകുന്നത്. ഇതുകാരണം ശ്രദ്ധയിൽപ്പെടില്ലാത്തതിനാലാണ് പലപ്പോഴും പിടിക്കപ്പെടാതെ പോകുന്നതെന്നു സിഐ പി.എം ഷമീർ പറഞ്ഞു. വാഹനം ജില്ലാ ജിയോളജിസ്റ്റിനു കൈമാറി.

The post തമിഴ്നാട്ടിലേക്കു അനധികൃത മണ്ണു കടത്ത്; കൊളത്തൂരിൽ ലോറി പിടികൂടി appeared first on Valanchery Online.

ഉത്തർപ്രദേശിലേക്ക് ഇതരസംസ്ഥാന തൊഴിലാളികളെ കടത്താൻ ശ്രമിച്ച ലോറി കുറ്റിപ്പുറത്ത് പിടികൂടി

വളാഞ്ചേരിക്കാരൻ — Sun, 17 May 2020 14:50:47 +0000

കുറ്റിപ്പുറം: ഇതരസംസ്ഥാന തൊഴിലാളികളെ കുത്തിനിറച്ച് ഉത്തർപ്രദേശിലേക്ക് കടത്തുകയായിരുന്ന ലോറി കുറ്റിപ്പുറം പോലീസ് കസ്റ്റഡിയിലെടുത്തു. ജില്ലയുടെ വിവിധഭാഗങ്ങളിൽ നിന്നുള്ള ഇതരസംസ്ഥാനക്കാരായ അറുപത്തി രണ്ടുപേരും കുറ്റിപ്പുറത്തു നിന്നുള്ള ഉള്ള അഞ്ചുപേരും അടക്കം 67 പേരാണ് ലോറിയിൽ ഉണ്ടായിരുന്നത്. യു.പിയിൽ നിന്ന് ചരക്കുമായെത്തിയ ലോറിയിൽ കുറ്റിപ്പുറം പാലത്തിനടിയിൽ ക്യാമ്പ് ചെയ്താണ് ആളെ നിറച്ചിരുന്നത്.

കുറ്റിപ്പുറം എസ്.എച്ച്.ഒ നാസറിന് ലഭിച്ച രഹസ്യവിവരത്തിന്റെ അടിസ്ഥാനത്തിൽ കുറ്റിപ്പുറം പോലീസ് കസ്റ്റഡിയിലെടുത്ത തൊഴിലാളികളെ താമസ സ്ഥലത്തേക്കു തന്നെ തിരിച്ചയച്ചു. കൂടുതലും തിരൂർ ഭാഗത്തുള്ള തൊഴിലാളികളായതിനാൽ ലോറി തിരൂർ പോലീസിന് കൈമാറി. പോലീസ് അന്വേഷണം ആരംഭിച്ചു.

The post ഉത്തർപ്രദേശിലേക്ക് ഇതരസംസ്ഥാന തൊഴിലാളികളെ കടത്താൻ ശ്രമിച്ച ലോറി കുറ്റിപ്പുറത്ത് പിടികൂടി appeared first on Valanchery Online.