shan enterprises Archives - Valanchery Online

കുറ്റിപ്പുറം നിക്ഷേപത്തട്ടിപ്പ്: അബ്ദുൾനൂർ വീണ്ടും അറസ്റ്റിൽ

വളാഞ്ചേരിക്കാരൻ — Thu, 04 Aug 2022 03:55:11 +0000

കുറ്റിപ്പുറം : കുറ്റിപ്പുറം നിക്ഷേപത്തട്ടിപ്പ് കേസിലെ പ്രതി വീണ്ടും അറസ്റ്റിലായി. കുറ്റിപ്പുറം തെക്കേ അങ്ങാടി കമ്പാല മുഹമ്മദ് അബ്ദുൾ നൂറിനെ(45)യാണ് കുറ്റിപ്പുറം സി.ഐ. ശശീന്ദ്രൻ മേലേയിൽ അറസ്റ്റുചെയ്തത്. 2008-ലാണ് റിയൽ എസ്റ്റേറ്റ് കച്ചവടത്തിന്റെ പേരിൽ നിക്ഷേപമായി സ്വീകരിച്ച കോടിക്കണക്കിനു രൂപ തട്ടിയെടുത്ത കേസിൽ ആദ്യം ഇയാൾ അറസ്റ്റിലാകുന്നത്. ജാമ്യത്തിലിറങ്ങിയതിനു ശേഷം മുങ്ങിയ ഇയാളെ പിന്നീട് 2013-ൽ പോലീസ് അറസ്റ്റുചെയ്തിരുന്നു.

ഇതിനുശേഷവും ജാമ്യത്തിലിറങ്ങിയ ഇയാൾ കേസുകളുടെ വിചാരണവേളയിൽ ഹാജരാകാതിരുന്ന സാഹചര്യത്തിലാണ് ബുധനാഴ്‌ച വീട്ടിൽനിന്ന്‌ പോലീസ് അറസ്റ്റു ചെയ്തത്. നിരവധി കോടതികളിൽ അബ്ദുൾ നൂറിനെതിരേ കേസുകളുണ്ട്.എസ്‌.ഐ. സജീഷ്, സി.പി.ഒ.മാരായ സുനിൽബാബു, ബിജു, രഞ്ജിത്ത് എന്നിവരും പോലീസ് സംഘത്തിലുണ്ടായിരുന്നു.

The post കുറ്റിപ്പുറം നിക്ഷേപത്തട്ടിപ്പ്: അബ്ദുൾനൂർ വീണ്ടും അറസ്റ്റിൽ appeared first on Valanchery Online.

കുറ്റിപ്പുറം നിക്ഷേപത്തട്ടിപ്പ്: ക്രൈംബ്രാഞ്ച് തെളിവെടുത്തു

വളാഞ്ചേരിക്കാരൻ — Sun, 27 Aug 2017 00:23:57 +0000

കുറ്റിപ്പുറം: കോടികള്‍ നിക്ഷേപമായി സ്വീകരിച്ച് തട്ടിപ്പുനടത്തിയ കേസില്‍ ക്രൈംബ്രാഞ്ച് തെളിവെടുത്തു. എസ്.ഐ. ഗഫൂറിന്റെ നേതൃത്വത്തിലുള്ള സംഘം ശനിയാഴ്ച കുറ്റിപ്പുറത്തെ പി.ഡബ്ല്യു.ഡി. റസ്റ്റ് ഹൗസിലെത്തിയാണ് തട്ടിപ്പിനിരയായവരുടെ മൊഴിയെടുത്തത്. 14പേര്‍ അന്വേഷണസംഘത്തിനുമുമ്പാകെ മൊഴിനല്‍കി. പതിനൊന്നരയ്ക്ക് ആരംഭിച്ച തെളിവെടുപ്പ് മൂന്നുമണിയോടെയാണ് അവസാനിച്ചത്. ഷാന്‍ എന്റര്‍പ്രൈസസ് ഉടമ കുറ്റിപ്പുറം കമ്പാല മുഹമ്മദ് അബ്ദുല്‍നൂറാണ് വന്‍തുക ലാഭം വാഗ്ദാനംചെയ്ത് കോടികള്‍ തട്ടിയെടുത്തത്. കേസില്‍ ക്രൈംബ്രാഞ്ച് അന്വേഷണം പുരോഗമിക്കുകയാണെന്ന് സി.ബി.സി.ഐ.ഡി. ഡെപ്യൂട്ടി പോലീസ് സൂപ്രണ്ട് കര്‍മസമിതി ഭാരവാഹികളെ അറിയിച്ചിരുന്നു. ക്രൈംബ്രാഞ്ചിന് ലഭിച്ച പരാതികളിന്മേലുള്ള തെളിവെടുപ്പാണ് ശനിയാഴ്ച നടന്നത്. നാലു കേസുകള്‍ രജിസ്റ്റര്‍ചെയ്തതില്‍ മൂെന്നണ്ണത്തിന്റെ കുറ്റപത്രം സമര്‍പ്പിച്ചിട്ടുണ്ട്. കര്‍മ്മസമിതി ഭാരവാഹികളും അന്വേഷണസംഘം മുമ്പാകെയെത്തി മൊഴി നല്‍കി. സി.പി.ഒമാരായ സുനില്‍കുമാര്‍, അമീര്‍ മുഹമ്മദ് എന്നിവരും തെളിവെടുപ്പു സംഘത്തിലുണ്ടായിരുന്നു.

The post കുറ്റിപ്പുറം നിക്ഷേപത്തട്ടിപ്പ്: ക്രൈംബ്രാഞ്ച് തെളിവെടുത്തു appeared first on Valanchery Online.

കൂറ്റിപ്പുറം നിക്ഷേപക തട്ടിപ്പ്: നൂര്‍ തിരൂര്‍ കോടതിയില്‍ നാടകീയമായി കീഴടങ്ങി

വളാഞ്ചേരിക്കാരൻ — Tue, 29 Oct 2013 00:24:25 +0000

തിരൂര്‍: കുറ്റിപ്പുറം നിക്ഷേപതട്ടിപ്പുകേസിലെ പ്രതി കമ്പാല സ്വദേശി മുഹമ്മദ് അബ്ദുല്‍ നൂര്‍ കോടതിയില്‍ കീഴടങ്ങി. ഇന്ന് തിരൂര്‍ ഒന്നാം ക്ലാസ് മജിസ്‌ട്രേറ്റ് കോടതിയിലാണ് നൂര്‍ കീഴടിങ്ങിയത്. കോടതി ഇയാളെ 14 ദിവസത്തേക്ക് റിമാന്റ് ചെയ്തു. ഇയാളുടെ പേരില്‍ കുറ്റിപ്പുറം പോലീസ് സ്‌റ്റേഷനില്‍ മൂന്ന് കേസുകളാണ് നിലവിലുളളത്.

‘ലാഭവിഹിതം’ എന്ന ഓമനപ്പേരില്‍ 100 കോടിരൂപയുടെ തട്ടിപ്പാണ് നൂര്‍ നടത്തിയത്. 2008 നവംബറില്‍ ഈ കേസില്‍ അറസ്റ്റിലായ നൂര്‍ ജാമ്യത്തിലിറങ്ങി വിദേശത്തേക്ക് മുങ്ങുകയായിരുന്നു. ഇതെ തുടര്‍ന്ന് 2012 ജനുവരിയില്‍ നൂറിനായി കേരള പോലീസ് ലുക്കൗട്ട് നോട്ടീസ് പുറപ്പെടുവിച്ചിരുന്നു.

ഒരു മതസംഘടനയുടെ പിന്‍ബലത്തിലായിരുന്നു ഈ തട്ടിപ്പിലേക്ക് നൂര്‍ ആളുകളെ കുടുക്കിയത്. ബിസിനസ്സിലേക്ക് പണം മുടക്കിയവര്‍ക്ക് ആദ്യമല്ലാം ആകര്‍ഷകമായ ലാഭവിഹിതം നല്‍കിയതോടെ കൂടതല്‍പേര്‍ ഈ തട്ടിപ്പില്‍ കുടുങ്ങുകയായിരുന്നു. പിന്നീട് മാസാമാസം പണം ലഭിക്കായത്ായതോടെ തട്ടിപ്പിനിരയായവരില്‍ ചിലര്‍ പോലീസിനെ സമീപിക്കുകയായിരുന്നു. ഇയാളുടെ ഉന്നതബന്ധങ്ങള്‍ പലരേയും ഇതില്‍ പരാതി നല്‍കുന്നതില്‍ നിന്ന് പിന്തിരിപ്പിച്ചു. നൂറിന്റെ കച്ചവടത്തില്‍ ചിലര്‍ ഇറക്കിയത് ബ്ലാക്ക്മണി യാണെന്നും അതാണ് പലരുടെയും പരാതി പുറത്ത് വരാഞ്ഞതെന്നും ആക്ഷേപമുയര്‍്ന്നിരുന്നു.

അക്കാലത്ത് നിരവധി വിദേശകാറുകളടക്കം സ്വന്തമാക്കി ആര്‍ഭാടജീവിതമാണ് നൂര്‍ നടത്തിവന്നത്. പോലീസ് അന്വേഷണം ആരംഭിച്ചതോടെ നൂര്‍ തന്റെ പല സ്വത്തുക്കളും ബിനാമകളുടെ പേരിലാക്കുകയായിരുന്നു.

വിദേശത്തേക്ക് മുങ്ങിയ നൂര്‍ കുറച്ച് ദിവസം മുമ്പ് നാട്ടിലെത്തിയിട്ടുണ്ടെന്ന വിവരം പരന്നതോടെ തട്ടിപ്പിനിരയായവര്‍ രൂപീകരിച്ച ആക്ഷന്‍കമ്മിറ്റി പ്രത്യക്ഷസമരരംഗത്തക്കിറങ്ങിയിരുന്നു. ഇതിനിടെയാണ് നൂറിന്റെ നാടകീയമായ കീഴടങ്ങല്‍.

The post കൂറ്റിപ്പുറം നിക്ഷേപക തട്ടിപ്പ്: നൂര്‍ തിരൂര്‍ കോടതിയില്‍ നാടകീയമായി കീഴടങ്ങി appeared first on Valanchery Online.